وتەبێژی حکومەتی عێراق ڕایدەگەیەنێت هیچ گۆڕانکارییەک بەسەر خشتەی کشانەوەی هێزەکانی هاوپەیماناندا نەهاتووە و دەبێت تا کۆتایی ئەمساڵ بکشێنەوە.
باسم عەوادی، وتەبێژی حکومەتی عێراق ڕایگەیاند، تا ئێستا خشتە کاتییەکانی ڕێککەوتنی نێوان عێراق و هێزەکانی هاوپەیمانان بۆ کشانەوەیان لە عێراق وەک خۆیان ماون.
مانگی ئەیلوولی ڕابردوو عێراق و هاوپەیمانان ڕێککەوتن کە تا کۆتایی 2025 ئەرکەکانی هاوپەیمانی نێودەوڵەتی بۆ بەرەنگاربوونەوەی داعش کۆتاییان بێت و دواتر پەیوەندییەکان بگۆڕێن بۆ هاریکاریی ئەمنی.
پێشتر مەسرور بارزانی، سەرۆکی حکومەتی هەرێمی کوردستان لە چاوپێکەوتنێکی لەگەڵ کەناڵی ئەلعەرەبییە سەبارەت بە چارەنووسی هێزەکانی هاوپەیمانان ڕایگەیاندبوو کە بەغدا بە هەڵوێستی خۆی لەسەر مانەوەی ئەو هێزانەدا دەچێتەوە و وتیشی: “ئێمە وەك هەرێمی كوردستان گوزارشتمان لە ویستی خۆمان بۆ میوانداریكردنی هێزەكانی هاوپەیمانان كە لە ناوچەكەدان، كردووە، ئەمەش وەك درككردنی هەرێمی كوردستان بەو مەترسی و ئاڵنگاری و كێشە ئەمنییانەی كە ڕووبەڕووی هەموومان دەبێتەوە. بەڵام وەك باسمان كرد، بەغدا لەسەر بنەمای ئەوەی كە زانیومانە، بە هەڵوێستی خۆیدا دەچێتەوە لەبارەی ئەو ماوە زەمەنییەی كە پێویستە بۆ مانەوەی هێزەكانی هاوپەیمانان لە وڵاتەكە”.
