وەزارەتی كشتوكاڵی عێراق ڕایدەگەیەنێت، نەخۆشی “پێ و دەم” لەناو مانگا و بەتایبەت جۆری (جاموس) بڵاوبۆتەوە و بەوهۆیەوە گواستنەوەی لەنێوان پارێزگاكان قەدەغە كراوە و دڵنیایی دەدات: “ئەو نەخۆشییە تەنها لەناو ئاژەڵدا دەگوازرێتەوە و ناگوازرێتەوە بۆ مرۆڤ”.
بەشی ڤێتێرنەری لە وەزارەتی کشتوکاڵی عێراق لە بەیاننامەیەكدا ئاماژەی بەوەكردووە، بەڕێوەبەرایەتی ڤێتێرنەری هاتووچۆی ئاژەڵەکانی لە بەهۆی نەخۆشیەکانی پێ و دەمەوە لە بەغداوە بۆ باقی پارێزگاکان و بەپێچەوانەشەوە، بۆ ماوەی ١٤ ڕۆژ قەدەغە کردووە.
محەمەد عەبدولڕەزا خوزاعی، وتەبێژی وەزارەتی كشتوكاڵی عێراق لە بەیاننامەیەكدا ئاماژەی بەوەكردووە، سەرجەم نەخۆشخانە و کلینیکەکانی ڤێتێرنەری لە بەغدا و سەرجەم پارێزگاکان ئاڕاستەكراون بۆ ئەوەی بەدواداچوون بكەن بۆ نەخۆشییەکانی دەم و پێ لە مانگادا لە بەغدا و پارێزگاكان، تاوەكو سەرجەم ئەو مانگایانە كۆبكرێنەوە و پشكنینیان بۆ بكرێت.
ئاماژەی بەوەشكرد، هەموو دەرمان و دژە زیندەییەکان بە ڕێژەیەکی زۆر لە سەرجەم نەخۆشخانەکان و کلینیکەکانی ڤێتێرنەری لە سەرجەم پارێزگاکانی عێراق بەردەستن.
وتیشی، “نەخۆشی پێ و دەم نەخۆشییەکە تەنها لەنێوان ئاژەڵدا دەگوازرێتەوە و بۆ مرۆڤ ناگوازرێتەوە”.
وتەبێژی وەزارەتەكە بە توندی ڕەتیکردەوە، کە “تووشبوون بەو ئاژەڵانە هەبووبێت، کە لە دەرەوەی عێراقەوە هاوردەکراون” و وتیشی، “ئەم ئاژەڵانە بە تەواوی دوورن لە هەر نەخۆشییەکی پەتا دوای ئەوەی هەموو ڕێکارەکانی پزیشکی ڤێتێرنەرییان بۆ ئەنجامدراون”.
جەختیشی لەوە کردەوە کە “نەخۆشی پێ و دەم نەخۆشییەکی ناوخۆییە لە عێراق لە ساڵانی ١٩٣٠وە و هەر چوار بۆ پێنج ساڵ جارێک چالاک دەبێت ئەگەر یەکێک لە مەرجەکانی کاراکردنەوەی جێبەجێ بکرێت، لەوانە دابەزینی پلەکانی گەرما”.
