وەزیری دارایی هەرێم پێشوازیکرد لە کونسوڵی گشتی کۆماری ئیسلامی ئێران لەهەولێر كرد و ڕایگەیاند، بەشێکی زۆری کێشەکانی بەردەم مووچە بۆ ساڵی ٢٠٢٥ چارەسەر بووە.
بەپێی ڕاگەیەنراوی وەزارەتی دارایی هەرێم، ئەمڕۆ یەك شەممە، ئاوات شێخ جەناب، وەزیری دارایی و ئابووری پێشوازیکرد لە فەرامەرز ئەسەدی، کونسوڵی گشتی نوێی کۆماری ئیسلامیی ئێران لەهەولێر.
کونسوڵی کۆماری ئیسلامی ئێران لەهەولێر خۆشحاڵی خۆی بە ڕێکكەوتنی نێوان حکومەتی هەرێم و حکومەتی فیدراڵ لەسەر مووچە دەربڕی و ڕایگەیاند، کۆماری ئیسلامی ئێران ڕۆڵی ئەرێنی دەبینێت بۆ چارەسەرکردنی کێشەکانی نێوان هەرێمی کوردستان و حکومەتی فیدراڵ.
لای خۆشیەوە، ئاوات شێخ جەناب ڕایگەیاند، لەسەر بنەمای ئەو ڕێكکەوتنەی لەگەڵ حکومەتی فیدراڵ کراوە بەشێکی زۆری کێشەکانی بەردەم مووچە بۆ ساڵی ٢٠٢٥ چارەسەر بووە و ئەوەش هەنگاوێکی گرنگە بۆ ئەوەی هەرێمی کوردستان بتوانێت کار لەسەر سەرپێخستنەوەی پڕۆژەکان بکات و شایستەی داراییان بۆ دابین بکات.
بەپێی ڕاگەیەنراوەكە، “کونسوڵی گشتی کۆماری ئیسلامی ئێران لەهەولێر چەند داواکاریەکی لەسەر کێشە و شایستەکانی کۆمپانیا ئێرانیەکان خستەڕوو، کە پڕۆژەی جیاوازیان لەگەڵ حکومەتی هەرێم هەیە”.
وەزیری دارایی ڕایگەیاند، لەماوەی ڕابردوودا لایەنە پەیوەندیدارەکانی وەزارەتی ڕاسپاردووە کە کارئاسانی تەواو بۆ ڕایکردنی کاری ئەو کۆمپانیایانە بکەن و بەپێی توانا کار لەسەر خەرجکردنی شایستەکانیان بکەن بەچەند قۆناغێک.
