بریكاری وه‌زاره‌تی په‌روه‌رده‌ی حكومەتی هەرێمی كوردستان ڕایدەگەیەنێت، داوامان له سه‌رۆكایه‌تیی ئه‌نجوومه‌نی وه‌زیران كردووه قه‌ره‌بووی مامۆستایانی خانه‌نشین بكرێته‌وه، ئه‌گه‌ر تا كۆتایی ده‌وامی ئه‌مساڵ له ده‌وام بەردەوام بن.
سه‌یوان عه‌لی، بریكاری وه‌زاره‌تی په‌روه‌ردەی هەرێم، به ماڵپه‌ڕی فه‌رمی پارتی ڕاگه‌یاندووە، ته‌نیا له وه‌زاره‌تی په‌روه‌رده پێنج هه‌زار و 534 مامۆستا خانه‌نشین ده‌بن و به‌و هۆیه‌وه كه‌رتی په‌روه‌رده میلاكی كه‌م ده‌بێته‌وه، چونكه خانه‌نشینبوونی ئه‌و ژماره زۆره‌ی مامۆستا كاریگه‌ریی خۆی له‌سه‌ر كه‌رتی په‌روه‌رده هەیە.
وتیشی، “ئێمه داوامان له سه‌رۆكایه‌تیی ئه‌نجوومه‌نی وه‌زیران کردووە ئه‌و مامۆستایانه‌ی خانه‌نشین ده‌بن، تا كۆتایی ساڵی خوێندن له ئه‌ركه‌كانیان بەردەوام بن”.
ئاماژەی بەوەشكردووە، داوامان له سه‌رۆكایه‌تیی ئه‌نجوومه‌نی وه‌زیران كردووه، ئه‌و مامۆستایانه‌ی خانه‌نشین ده‌بن و به‌رده‌وام ده‌بن له ئه‌ركه‌كانیان، پاداشت بكرێن و له‌بری ئه‌و ده‌وامه‌ی دەیکه‌ن، قه‌ره‌بوو بكرێنه‌وه.
له‌باره‌ی دامه‌زراندنی مامۆستا و وانه‌بێژ بۆ پڕكردنه‌وه‌ی میلاكی وه‌زاره‌تی په‌روه‌رده، سه‌یوان عه‌لی ئاشكرای كرد، ڕێنمایی دارایی بڵاوكراوه‌ته‌وه و له ئێستادا دامه‌زراندن وه‌ستاوه، له‌به‌رئه‌وه‌ش ناتوانین مامۆستای نوێ دابمه‌زرێنین.
