سەرۆکی هەرێمی کوردستان لەبارەی دۆخی سووریا و مافی کورد دەڵێت” بە برایانی کوردمان لە سووریا وتووە ئێوە خاوەنی سووریای نوێن”.
نێچیرڤان بارزانی، سەرۆکی هەرێمی کوردستان، لەکۆنفرانسێکی ڕۆژنامەوانیدا ڕایگەیاند، لەگەڵ یەکێتی گەیشتوینەتە ئاستیکی باش لە تێشگەیشتن و هیوادارین بەم زوانە لەسەر دابەشکردنی پۆستەکان ڕێکبکەوین، و بتوانین لە زوترین کاتدا کابینەی دەیەمی حکومەتی هەرێم پێکبهێنین.
ئاماژەی بەوەشدا، ئێمە لەگەڵ برایانی کوردمان لە سووریا کۆبوینەتەوە و ڕامانگەیاندووە دەمانەوێت فاکتەری سەقامگیری بین لە سووریای نوێ و پێمان وتون ئێوە خاوەنی سووریای نوێن و دەبێت خۆتان پێگەتان هەبێت نەک بەنگهێشت بکرێن.
ڕاشیگەیاند، ئەزموونی هەرێمی کوردستانمان لەگەڵ بەغدا بۆ ڕوونکردونەتەوە، بەتایبەت لەدوای ساڵی 2003 کە پرۆسەیەکی سیاسی سەرکەوتوومان لەگەڵ بەغدا هەیە و سەرکەوتووبوین لە بەشداریکردن لە پرۆسەی سیاسی عێراق.
لەبارەی دۆخی سووریا، نێچییرڤان بارزانی ڕایگەیاند، هیوادارین سەرۆکی سووریا فرە پێکهاتەیی سووریا ببینێت، و هیوادارین ئەحمەد شەرع ببێتە هۆی سەقامگیری بۆ سووریا، و ئێمە بەڕاستەوخۆ بەبەرپرسانی سووریامان وتووە فاکتەری سەقامگیری دەبین.
سەرۆکی هەرێم جەختیشیکردەوە، مانەوەی هێزەکانی هاوپەیمانان لە عێراق و سووریا بە پێویست دەزانین، و ڕاستەوخۆ ئەمەمان بە ئەمریکییەکان وتووە، ڕەنگە لەگەڵ عێراق بۆچوونمان جیاوازبێت بەڵام ئێمە لەبەرژەوەندی تەواوی عێراق مانەوەی ئەو هێزانە بە پێویست دەزانین، جوکە هێشتا مەترسی سەرهەڵدانەوەی داعش هەیەو ئێمە بەمەترسییەکی جدی بۆ ئاسایش و سەقامگیری هەرێم و عێراقی دەزانین.
لەبارەی هاتنی شاندی ئیمراڵی بۆ هەرێم، سەرۆکی هەرێم ڕایگەیاند، سبەینی لەگەڵ شاندی ئیمراڵی کۆدەبمەوە و هیوادارم پەیامی ئاشتی ئامانجی خۆی بپێکێت، و چاوەڕوان دەکرێت لەکۆتایی ئەم مانگەدا پەیامەکە بڵاوبکرێتەوە، و هیواداریشین پەکەک پێشوازی لە بانگەوازی ئۆجەلان بکات لەبارەی پرۆسەی ئاشتی.
