سەرۆک کۆمار هەموارى یاساى بودجەى واژۆکرد و دوای بڵاوکردنەوەی لە ڕۆژنامەی فەرمیی عێراق، دەکەوێتە بواری جێبەجێکردنەوە.
ئەمڕۆ یەکشەممە، ئامانج ڕەحیم، سکرتێری ئەنجوومەنی وەزیرانی هەرێمی کوردستان ڕایگەیاند، د. لەتیف ڕەشید، سەرۆک کۆماری عێراق ئیمزای لەسەر دەرچوواندنی یاسای هەمواری یەکەمی یاسای بودجەی عێراقی فیدڕاڵ ژمارە 13 ساڵی 2023ی کرد.
هەموارەکە تایبەتە بە هەناردەکردنەوەی نەوتی هەرێمی کوردستان لە رێگەی کۆمپانیای سۆمۆ و دانانی داهاتی فرۆشتنی نەوتی هەناردەکراوی هەرێم لە خەزێنەی گشتی فیدڕاڵیی ئەویش بە گوێرەی ڕێکارەکانی هاتوو لە بڕگەکانی هەموارەکە تایبەت بە تێچووی بەرهەمهێنان و گواستنەوەی نەوتەکە.
میدیای فەرمی یەکێتی بڵاویکردەوە، چاوەڕوان دەکرێت یاساکە سبەینێ لە ڕۆژنامەی وەقائیعی عێراقدا بڵاوبکرێتەوە، بەوەش یاساکە دەکەوێتە بواری جێبەجێکردنەوە.
