سوپای عێراق ڕێگری لە جوتیارانی سەرگەڕانی سنووری کەرکووک دەکات زەوییەکانیان بکێڵن.
ئەمڕۆ یەکشەممە، ژمارەیەک جوتیاری کورد بەمەبەستی کێڵانی زەوییەکانیان لە گوندی سەرگەڕان کۆبوونەوە، ئەویش دوای ئەوەی ئەنجومەنی نوێنەران یاسای هەڵوەشاندنەوەی بڕیارەکانی مەجلیسی قیادەی سەورەی بەعسی دەرکرد و یاساکەش لەلایەن سەرۆک کۆمارەوە پەسەند کرا.
دوای گەیشتنی جوتیاران و کێڵانی بەشێک لە زەوییە کشتوکاڵییەکان، هێزێکی سوپای عێراق چووە ناوچەکە و ڕێگری کرد لە جوتیاران بەردەوام بن لە کێڵانی زەوییەکان.
جوتیارانی کەرکووک ڕایانگەیاند، سەرباری یاساکەی پەرلەمان و پەسەندکردنیشی لەلایەن سەرۆک کۆمارەوە، بەڵام سوپا هاتووە و دەڵێن فەرمانیان پێکراوە ڕێ بە کێڵانی زەوییەکان نەدەن.
یەکێک لە جوتیاران لە سەرگەڕان ڕایگەیاند چیتر ئارامگرتنیان نەماوە و زەوییەکانیان دەکێڵن.
