بارینی بەفرێکی چڕ، بووە هۆی داخستنی ڕێگەی نێوان چەندین گوند و ئاوایی لە پارێزگاکانی هەکاری، مووش و بەدلیس لە باکوری کوردستان.
دەزگای ئافاد و کارەساتەکانی تورکیا بڵاویکردەوە، بارینی بەفر ڕێگەی نێوان ٢٨٤ گوند داخستووە و تیمەکانی کردنەوەی ڕێگەوبان توانیویانە ڕێگەی هاتوچۆی ٢٨٢ ناوچەی نیشتەجێبوون بکەنەوە، هاوکات لە پارێزگای مووش’یش ڕێگەی نێوان ٤١ گوند بە تەواوی داخراوە.
سکرتێری گشتی فەرمانگەی تایبەت لە پارێزگای مووش، شێخموس یەنتور باسی لەوە کرد کە بەهۆی بەفرەوە ڕێگاوبانی ٤١ گوندی بەڕووی هاتوچۆدا داخراون، و تیمەکانیان لەو ناوچانەدا بە چڕی کار دەکەن بۆ کردنەوەی ڕێگا داخراوەکان.
لە پارێزگای بەدلیس شەپۆلێکی چڕی بەفر بارین ڕووی لە ناوچەکە کرد و، بەهۆیەوە ڕێگای ٤٩ ناوچەی نیشته‌جێبوون بە ڕووی هاتوچۆدا داخراون.
بەڕێوەبەری خزمەتگوزاری ڕێگا و گواستنەوەی سەربە فەرمانگەی تایبەتی پارێزگای بەدلیس، ئومیت کورتکان ئاماژەی بەوەکرد کە بەهۆی به‌فر بارینەوە ڕێگای ٤٩ گوند بەڕووی هاتوچۆدا داخراون و هەوڵەکان بۆ کردنەوەیان بەردەوامە.
