لیژنە پەرلەمانییەكەی عێراق بەدواداچوون بۆ هۆكاری دابەشنەكردنی مووچەی فەرمانبەرانی كوردستان بۆ مانگی 12ـی ساڵی ڕابردوو دەکات و ڕاپۆرتێك پێشكەشی وەزارەتی دارایی و محەمەد شیاع سودانی دەكات و سەرۆك وەزیرانی عێراق لەسەر ئەو ڕاپۆرتە بڕیار لە چارەنووسی مووچەی مانگی 12 دەدات.
لە ماوەی ڕابردوودا لیژنەیەك لە پەرلەمانی عێراق بۆ بەدواداچوونی دابەشنەكردنی مووچەی مانگی 12ی ساڵی ڕابردووی مووچەخۆرانی هەرێم پێكهێنراوە لەكاتێكدا عێراق 441 ملیار دیناری بۆ مووچەی مانگی 12ی هەرێم ناردبوو، لیژنەكەش لە كارەكانی بەردەوامە و بڕیارە بەم زووانە ڕاپۆرتەكەی بخاتە سەردەم سەرۆك وەزیران و وەزیری دارایی.
بە پێی زانیارییەکان، لە ڕاپۆرتەكەدا تەواوی ئەو وردەكارییانە ڕوون دەكرێتەوە لەسەر ئەو بڕە پارەیەی لە لایەن عێڕاقەوە بۆ هەرێمی كوردستان نێردراوە، چونكە بەپێی قسەی بەرپرسانی عێراق و هەرێمی كوردستان، جیاوازی لە پارەی هاتوودا هەیە.
د. نەرمین مەعروف، ئەندامی لیژنەی دارایی پەرلەمانی عێراق و ئەندامی ئەو لیژنە پەرلەمانییە ڕایگەیاندووە، بۆ مووچەی مانگی 12ی ساڵی ڕابردو لیژنەیەك پێكهێندراوە و كارەكانیان بە كۆتا نەهاتووە.
ئاماژەی بۆ ئەوەشکرد، چاوەڕوان دەكرێت لەم هەفتەیەدا لەسەر ئەو پرسە كۆبوونەوە ئەنجام بدەین.
لە مانگی 12ی ساڵی ڕابردوودا وەزارەتی دارایی عێراق ڕایگەیاند، كە بڕی 441 ملیار دیناریان بۆ مووچەی مانگی 12ی مووچەخۆرانی هەرێم ناردووە و بڕەكەی دیكەشی هەرێم بەهۆی ڕادەستنەكردنی داهاتی ناوخۆوە دەبێت تەواوی بكات و مووچەی مانگی 12ی پێ دابەش بكات، بەڵام بەرپرسانی هەرێم ڕەتیانكردەوە ئەو بڕە بەشی مووچە بكات و ڕایانگەیاند، كە بەشێكی بۆ كورتهێنانی مووچەی مانگی 11 خەرج كراوە و تەنها بڕی 200 ملیار دیناری ماوە و بەشی مووچە ناكات.
بەرپرسانی هەرێم لە سەرەتای ئەم مانگەدا، كە سەردانی بەغدایان كرد بۆ ڕێككەوتن لەسەر مووچەی ساڵی 2025 و دوای ڕاگەیاندنی ڕێككەوتنەكە ئاماژەیان بەوەكردووە، داوایان كردووە بڕێك پارە بە قەرز بدرێتە هەرێم بۆ چارەسەر كردنی مووچەی مانگی 12ی مووچەخۆران.
