ئەمڕۆ رۆژی جیهانی شێرپەنجەی منداڵانە، 15ی شوباتی هەموو ساڵێک وەک رۆژی جیهانیی شێرپەنجەی منداڵان دیاریکراوە، بەگوێرەی دوایین ئاماری ئەنجوومەنی شێرپەنجەی عێراق، نزیکەی 2000 منداڵی تووشبووی شێرپەنجە لە عێراق و هەرێمی کوردستان تۆمارکراون.
د. سورا یاسین، بەڕێوەبەری هۆبەی تۆمارکردنی شێرپەنجە لە ئەنجوومەنی شێرپەنجەی عێراق لە لێدوانێکیدا ڕایگەیاند: “بەگوێرەی ئامارەکانمان، لە ساڵی 2023دا کە دوایین ئاماری کۆکراوەی عێراقە، 43 هەزار و 62 تووشبووی شێرپەنجە لە عێراق و هەرێمی کوردستان تۆمارکراون”.
ئاشكراشی كرد، لەو ژمارەیە هەزار و 922 تووشبوویان منداڵی کۆرپە تاوەکو تەمەن 14 ساڵی بوون، هەزار و 62یان منداڵی کوڕ بوون و 860یشیان منداڵی کچ بوون.
ئاماژەی بەوەشکردووە، لەو ژمارە تووشبووە 448یان گیانیان لەدەستداوە.
ئەو پزیشكە باسی لەوەشکرد، دیارترین جۆرەکانی شێرپەنجە لە منداڵاندا شێرپەنجەی خوێنە، کە لەو ساڵەدا 551 منداڵ تووشبوون و لەو ژمارەیەش 140 کەسیان گیانیان لەدەستداوە، لە دوای ئەویش جۆرەکانی شێرپەنجەی مێشک و لیمفەگرێکان دێن.
