شاندی ئیمراڵی و پارتە كوردییەكانی باكووری كوردستان بۆ تاوتوێکردنی گفتوگۆکانی دەم پارتی و بەرپرسانی حکومەتی تورکیا تایبەت بە پڕۆسەی ئاشتی، گەیشتە هەرێمی کوردستان.
شاندەکە پێکدێن لە سری سورەییا ئۆندەر، بریکاری سەرۆکی فراکسیۆنی دەم پارتی و پەروین بوڵدان، پەرلەمانتاری دەم پارتی لە بازنەی وان و کەسکین بایندر، هاوسەرۆکی پارتی هەرێمە دیموکراتەکان (بەدەپە) لە تورکیا.
پەروین بوڵدان، ئەندامی شاندەکە بۆ ڕۆژنامەنووسان ڕایگەیاند، ئەمڕۆ دەچنە هەولێر و لەگەڵ مەسعود بارزانی، سەرۆكی پارتی دیموكراتی كوردستان و نێچیرڤان بارزانی، سەرۆکی هەرێمی کوردستان کۆدەبنەوە.
ئاشكراشی كرد، دوای هەولێر، شاندەکەیان دەچێتە سلێمانی و لەگەڵ بافڵ تاڵەبانی، سەرۆكی یەكێتیی نیشتمانیی كوردستان و قوباد تاڵەبانی، جێگری سەرۆك وەزیرانی هەرێم کۆدەبنەوە.
ئەو ئەندامەی شاندەکە ئاماژەی بەوەشکرد، لە سەردانەکەدا پەیامی عەبدوڵڵا ئۆجەلان، ڕێبەری زیندانیکراوی پەکەکە بۆ پڕۆسەی ئاشتی دەگەیەنن.
