وەزیری سامانە سروشتییەکانی حكومەتی هەرێمی كوردستان ڕایدەگەیەنێت، پەرەپێدانی غازی سروشتی بۆ باشكردنی ژێرخانی ئابووری و گەیشتن بە كارەبای 24 كاتژمێری زۆر گرنگە، باس لەوەش دەکات کە ئاستی کارەبا بۆ چوار هەزار مێگاوات بەرزدەکەنەوە.
كەمال محەمەد ساڵح، وەزیری سامانە سروشتییەکان بەوەکالەت، بە میدیای پارتی ڕاگەیاند: “كێڵگەی كۆرمۆر، كە لەلایەن هەردوو كۆمپانیای دانەغاز و كۆمپانیای هیلالی ئیماراتییەوە وەبەرهێنانی تیادا دەكرێت و ڕۆژانە 530 ملیۆن پێ سێجا غازی لێ بەرهەم دەهێنرێت، بەشێكی زۆری ئەو غازە ڕەوانەی وێستگەكانی بەرهەمهێنانی كارەبا دەكرێت، تەنانەت بەشێكیش لە كارەبا لەلایەن وەبەرهێنەكانی كارەباوە دەدرێتە شارەكانی موسڵ و كەركوك و دیالە، ئەو بودجەیەش بەشێكی دەدرێتە كۆمپانیای دانەغاز و بەشەكەی دیكەی دەدرێتە وەبەرهێنەكانی بەرهەمهێنانی كارەبا”.
باسی لەوەشکرد: “بەرهەمی كارەبامان ئێستا سێ هەزار 900 مێگاواتە و بڕیارە ئەمساڵ ئاستەكەی بۆ چوار هەزار مێگاوات بەرز بكەینەوە و بەرهەمەكەش بەشی زۆری بۆ غازی سروشتی دەگەڕێتەوە، كە لە كێڵگەی كۆرمۆر دابین دەكرێت”.
وەزیری كارەبا ئاشكراشی كرد: “پەرەپێدان لە كێڵگەی دانەغاز بۆ باشكردنی ژێرخانی ئابووری و گەیشتن بە كارەبای 24 كاتژمێری و جێبەجێكردنی پڕۆژەی ڕووناكی زۆر گرنگە”.
دەشڵێت : “پەرەپێدانی غاز زیاد دەکرێت و بەرهەمی کارەبا زیاد دەبێت”.
كەمال محەمەد ساڵح، ئەوەشی خستەڕوو: “ئێمە توانیومانە سەرچاوەكانی بەرهەمهێنانی كارەبا جۆراوجۆر بكەین، بە نەوتی ڕەش و وێستگەی هەڵمیی خەبات و هایدرۆپاوەری دووكان و دەربەندیخان و دیرەلۆك و گازوایل و غاز و تەنانەت لە بواری بەرهەمهێنانی كارەبا بە وزەی خۆر هەنگاوی باشمان ناوە”.
وەزیری كارەبا جەختی كردەوە: “هەموو ئەو سەرچاوانەی بۆ بەرهەمهێنانی كارەبا هەن، خراونەتە خزمەتی دابینكردنی كارەبای نیشتمانی بۆ تەواوی هاووڵاتییانی هەرێمی كوردستان، بۆ ئەوەی زۆرترین كارەبایان پێ بدرێت”.
ئەوەشی خستە ڕوو: “پڕۆژەی ڕووناکی بۆ کارەبای 24 کاتژمێری هەنگاوی باشی ناوە و هەموو هەرێمی کوردستان دەگرێتەوە”.
