وتەبێژی یەكێتی خانەنشینانی كوردستان ڕایدەگەیەنێت، یاسای خانەنیشینی یەكگرتوو بەبێ دەستكاریكردن بەسەر هەموو خانەنشینانی هەرێمدا جێبەجێ دەكرێت و ئەو فەرمانبەرانەی تازە خانەنشین دەبن 12 مووچە پێکەوە وەردەگرن.
سادق شێخ عوسمان، وتەبێژی یەكێتی خانەنشینانی كوردستان بە “تۆڕی میدیایی خەڵک”ی ڕاگەیاند: بەپێی دواین رێككەوتنی هەردوو لیژنەی دارایی هەرێم و بەغدا یاسای خانەنیشینی یەكگرتوو بەبێ دەستكاریكردن بەسەر هەموو خانەنشینانی هەرێمدا جێبەجێ دەكرێت.
باسی لەوەشکرد: ئەو فەرمانبەرانەی كە لە مانگی 12ـی ساڵی رابردوو خانەنشین بوون، 12 مووچە بەسەر یەكەوە وەردەگرن و ئەو فەرمانبەرانەی پێش ساڵی 2023 خانەنیشینكراون سەرجەم ئیمتیازات و مافەكانیان وەردەگرن و مووچەیان هاوشێوەی خانەنیشینانی عێراق دەبێت.
ئەوەشی خستەڕوو: یاسای خانەنیشینی یەكگرتوو بەسەر هێزە ئەمنییەكان و پێشمەرگەشدا جێبەجێ دەكرێت و ئەفسەرێكی پشمەرگە لەكاتی خانەنیشینبووندا وەك ئەفسەرێكی سوپای عێراق مامەڵەی لەگەڵدا دەكرێت و بەهەمان یاسا و شێوە خانەنشین دەكرێن.
