سەرۆکی حکومەتی هەرێمی کوردستان ڕایدەگەیەنیت کە زیندووکردنەوەی پرسی سەربەخۆیی کورد دەکەوێتە سەر شێوازی مامەڵەی ئەو وڵاتانەی کە کوردیان تێدایە و ڕیفراندۆمەکەی 2017ش نە تاوان بوو نە هەڵە.
مەسرور بارزانی، سەرۆکی حکومەتی هەرێمی کوردستان لە میانی چاوپێکەوتنێکی لەگەڵ کەناڵی ئەلعەرەبییە، دەربارەی پرسی زیندووکردنەوەی پرسی سەربەخۆیی ڕایگەیاند، پێموایە كە بابەتەكە دەوەستێتە سەر ئەو ڕێگەیەی كە مامەڵەی لەگەڵ كورد پێ دەكرێت. ئەگەر سەیری یەكێتیی ئەوروپا بكەین كە ساڵانێكی زۆر و بگرە چەندان دەیە شەڕ كرا لەپێناو دروستكردنی دەوڵەتە تایبەكانی خۆیان، كەچی ئێستا یەكێتیی ئەوروپایان هەیە. ئەوان ئەم قۆناغەیان تێپەڕاند و دەیانەوێ لێك بدرێن و یەكێتییەكیان هەبێت وەك یەك قەوارە. بابەتەكە دەوەستێتە سەر ئەو وڵاتانەی كە كورد تێیدا دەژین و چۆن مامەڵەیان لەگەڵ دەكەن. بەداخەوە مێژوومان پڕە لە زوڵم و نایەكسانی، ئەگەر بابەتەكە بەم شێوەیە بەردەوام بێت، ئەوا كاردانەوەی كورد هاوشێوە دەبێت، بەڵام ئەگەر نزیكبوونەوەی تازە خرایە ڕوو كە لەسەر قەبووڵكردن و رێزگرتن و یەكسانی و دادپەروەری بونیاد نرابێت، دەكرێ گەلان پێش بكەون و بەیەكەوە بەرەو ئایندەیەكی سەقامگیر و ئاشتییانە بڕۆن. پێموایە كە بابەتەكە دەوەستێتە سەر ئەو ڕێگەیەی كە پێی مامەڵەمان لەگەڵدا دەكرێت.
سەبارەت بە ڕیفراندۆمەکەی 2017ش ڕایگەیاند، ریفراندۆم بۆ پرسیارکردن بوو لە گەل دەربارەی ئەو شتەی دەیانەوێت، ڕیفراندۆم نە تاوان بوو نە هەڵە و شتێکی ڕێپێدراوە و ڕیفراندۆم لە سکۆتلەندا و کیپیک و کوردستان کرا، شێوازی مامەڵەکردنی بەریتانیا و کەنەدا جیاواز بوو لەو مامەڵەیەی کە بەغدا لەگەڵ هەولێر کردی.
وتیشی: “ڕیفراندۆممان کرد چونکە بەغداد ڕەتیکردەوە ڕێز لە دەستووری عێراق بگرێت وەک وڵاتێکی فیدراڵی و دەبوو عێراق وەک وڵاتێکی فیدراڵی ڕێزی لە مافی گەلی کورد بگرتایە، مافی کورد بە شێوازێکی بەرنامە بۆ داڕێژراو پێشێل دەکرا سەرباری ئەوەی ئاگاداردەکرانەوە کە ئەوە قبوڵ ناکرێت”.
