سەرۆك وەزیرانی هەرێمی كوردستان ڕایدەگەیەنێت،هەموو ئەو تۆمەتانەی دەدرێنە پاڵ هەرێمی كوردستان بە بوونی ئیسرائیل لە هەرێمی كوردستان دورن لە ڕاستی و بیانوو دروستكردنە بۆ ئەوەی هێرش بكەنە سەر هەرێمی كوردستان و دەشڵێت: هەسەدە نوێنەرایەتی هەموو كورد لە سووریا ناكات.
مەسرور بارزانی، سەرۆك وەزیرانی هەرێم لە دیمانەیەكی تایبەتی كەناڵی (العربیە) ڕایگەیاندووە، ئەو تۆمەتانە هیچ بنەمایەكی ڕاستییان تێدا نییە و دەتوانین زۆر بەڕوونی بڵێین: ئەوە ڕاست نییە و ئیسڕائیل لە هەرێمی كوردستان نییە و هیچ شوێنێكیان لە هەرێمی كوردستان نییە.
وتیشی: جێی داخە زۆرینەی ئەو تۆمەتانەی دەدرێنە پاڵ هەرێمی كوردستان لەلایەن ئەو كەسانەوەیە كە هیچ بیانوێكیان نییە بۆ هێرشكردنە سەر هەرێمی كوردستان، ئەو تۆمەتانە لەبەر ئەوە دروست دەكەن بۆ ئەوەی بیانوو بۆ كارە خراپەكانیان و هێرشە بێ بنەماكانیان دژی هەرێمی كوردستان بێننەوە.
لەبارەی هێزەكانی سووریای دیموكرات “هەسەدە”، مەسرور بارزانی وتی: هێزەكانی سووریای دیموكرات نوێنەرایەتی هەموو كورد ناكات، بەڵكو نوێنەرایەتی بەشێك لە كورد دەكات.
دەشڵێت: نازانم چی لەنێوان هێزەكانی سووریای دیموكرات و دیمەشق ڕوودەدات، بۆیە هیچ لێدوانێكم لەو بارەیەوە نییە، بەڵام پێم وایە لەسەر دیمەشق پێویستە لەگەڵ تەواوی پارتە كوردییەكان بكەوێتە گفتوگۆ، نەوەك تەنیا هێزەكانی سووریای دیموكرات.
سەبارەت بە هێزی هاوپەیمانان، مەسرور بارزانی وتی: گوزارشتمان لە خواستی هەرێمی كوردستان كردووە بۆ پێشوازیی لە هێزەكانی هاوپەیمانان، كە لە ناوچەكەدا هەن، بە هەستكردن بەو مەترسی و ئالەنگارییە ئەمنیانەی ڕووبەڕووی هەمووان دەبێتەوە.
جەختیشی كردەوە، بەپێی زانیارییەكان عێراق سەبارەت بەو ماوە زەمەنییەی دیاریكردووە بۆ مانەوەی هێزەكانی هاوپەیمانان لە عێراقدا دەیەوێت بە هەڵوێستەكانی خۆیدا بچێتەوە.
