وەزیری دەرەوەی عێراق ڕایدەگەیەنێت، سەرقاڵی ئامادەكارین بۆ لوتكەی عەرەبی لە مانگی ئازاری داهاتوودا و دەشڵێت: هەموو سەركردەكانی عەرەب بانگهێشت دەكەین بۆ لوتكەی عەرەبی، بە ئەحمەد شەرعی سەرۆكی سووریاشەوە.
فوئاد حسێن، وەزیری دەرەوەی عێراق لە چاوپێكەوتنێكدا لەگەڵ كەناڵی (France 24)ی فەڕەنسی ڕایگەیاند، عێراق هیچ مەرجێكی نییە بۆ مامەڵەكردن لەگەڵ ئیدارەی نوێی سووریا، بەڵام هەندێك ڕوانگەی تایبەت بە خۆمان هەیە سەبارەت بە ئایندەی سووریا.
وتیشی، “وەزیری دەرەوەی سووریام بانگهێشت كردووە بۆ ئەوەی سەردانی عێراق بكات و بەمزووانە سەردانی عێراق دەكات و سەرقاڵی ئامادەكارین بۆ لوتكەی عەرەب (لە مانگی ئازاری داهاتوودا)، لوتكەكە جیاواز دەبێت بەوپێیەی لە بەغدا بەڕێوەدەچێت و لەبارودۆخێكی جیاوازیشدا بەنیسبەت وڵاتانی عەرەبییەوە بەڕێوەدەچێت”.
ئاشكراشی كرد، هەموو سەركردەكانی عەرەب بانگهێشت دەكەین بۆ لوتكەی عەرەبی، بە ئەحمەد شەرعی سەرۆكی سووریاشەوە، بانگهێشتی بەشداریكردن لە لوتكەكە بۆ هەمووان دەڕوات، ئەوەی بەشداری دەكات یاخود نایكات بڕیارەكە بۆ خۆی دەگەڕێتەوە.
ئەحمەد شەرع وەكو ئەندامێكی رێكخراوی قاعیدە لە زیندانی عێراقدا بوو، وەكو خۆی دەڵێ: تەنیا بەر لە دوو رۆژ لە راپەڕینی خەڵكی سوریا دژی ئەسەد لە 2011دا، بەشێوەیەكی سوتفە ئازادكراوە، سەرچاوەكان دەڵێن: ئێستاش لەلایەن عێراقەوە فەرمانی دەستگیركردن هەیە، هاتنی بۆ بەغدا ڕەنگە هەندێك لە لایەنە شیعەكان توڕە و نیگەران بكات.
فوئاد حسێن وتیشی، “دەست بە گفتوگۆ دەكەین لەگەڵ لایەنی ئەمریكیدا، بیرۆكەیەكمان پیشنیار كردووە بۆ ئەوەی دیالۆگی ستراتیژی لە واشنتۆن بەڕێوەبچێت، تائێستا وادەی گفتوگۆكە دیاری نەكراوە، بەڵام ئێمە لە پەیوەندیداین لەگەڵ ئیدارەی ئەمریكا و چاودێری سیاسەتی نوێی ئیدارەی نوێی ئەمریكا دەكەین”.
