چاودێرێكی سیاسی ئیسڕائیلی “مژدە” دەداتە خەڵكی غەززە، كە ترەمپ لەگەڵ ئەردۆغان ڕێكدەكەوێت بۆ گواستنەوەی نزیكەی 700 هەزار فەلەستینی بۆ ناوچەكانی ڕۆژئاوای كوردستان و ناوچە سنوورییەكان لەگەڵ توركیا و دەڵێت: بەوە مەترسی توركیا سەبارەت بە پەكەكە ناهێڵێ.
ئیدی كۆهین، نووسەر و چاودێری سیاسی ئیسڕائیلی لە تۆڕی (ئیكس) بڵاویكردۆتەوە، “پیرۆزە بۆ خەڵكی غەززە و سەفە، سەرۆك ترەمپ لێكۆڵینەوە لە ڕێككەوتنێك دەكات لەگەڵ توركیا بۆ گواستنەوەی نزیكەی 600 بۆ 700 هەزار فەلەستینی بۆ ناوچەكانی ڕۆژهەڵاتی فوڕات لە پارێزگاكانی حەسەكە و ڕەقە، كە ئەمریكای تێدایە”.
ڕاشیگەیاندووە، ئەوە دەبێتە بەشێك لە چارەسەر.
دەشڵێت: هەروەها دەگوازرێنەوە بۆ پارێزگای دێرەزوور و ناوچەكانی سنووری سووریا و توركیا، كە ئەوەش نیگەرانییە ئەمنییەكانی توركیا دەڕەوێنێتەوە سەبارەت بە پارتی كرێكاران.
جەختیشی كردۆتەوە، دەكرێت حوكمی نوێ لە دیمەشق ئەمە قبوڵ بكات بەرامبەر بە پاڵپشتی سیاسی و ئابووری.
