سەرۆكی یەكێتیی نیشتمانیی كوردستان ڕایدەگەیەنێت، پاراستنی مافی هەموو نەتەوە و پێكهاتەكان بە تایبەت كورد و بەشداربوونیان لە بڕیار و بنیادناوەی سووریای نوێ زامنی سەقامگیری دەبێت.
بافڵ جەلال تاڵەبانی، سەرۆكی یەكێتیی نیشتمانیی كوردستان لە پەراوێزی بەشداریكردنی لە كۆنفرانسی ئاسایشی میونشن لە ئەڵمانیا لەگەڵ تۆبیاس لیندنەر، وەزیری دەوڵەتی ئەڵمانیا بۆ كاروباری دەرەوە كۆبووەوە .
بەپێی ڕاگەیەنراوی نووسینگەی سەرۆكی یەكێتی، لەكۆبوونەوەكەدا جەخت لە پێویستی هەماهەنگی و كاری هاوبەش و پەرەپێدانی پەیوەندییەكانی هەردوولا كرایەوە لەپێناو كاراتركردنی هەوڵەكان بۆ پاراستنی ئاسایش و ئارامی لەناوچەكەدا .
دۆخی سووریا و ڕۆژئاوای كوردستان لەكۆبوونەوەكەدا بە وردی هەڵسەنگاندنی بۆ كرا و بافڵ تاڵەبانی پەرۆشی یەكێتیی بۆ چارەسەری ئاشتیانەی پرسی كورد لە سووریا تەئكیدكردەوە.
وتیشی، “پاراستنی مافی هەموو نەتەوە و پێكهاتەكان بە تایبەت كورد و بەشداربوونیان لە بڕیار و بنیادناوەی سووریای نوێ زامنی سەقامگیری دەبێت و هەر هەوڵێكیش لەدەرەوەی ئەم ئامانجە دۆخەكە ئاڵۆزتر دەكات، بۆیە ئەركی هەموولایەكە پشتگیری پاراستنی ناوچەكە و سەرخستنی هەوڵەكان بێت بۆ گەیشتن بە چارەسەری نیشتمانیی لەوبارەیەوە”.
