سەرۆكی هەرێمی كوردستان ڕایدەگەیەنێت، ئیتاڵیا له بواری ڕاهێنانی هێزه‌كانی پێشمه‌رگه و به‌هێزكردنی تواناكانی له چوارچێوه‌ی هاوپه‌یمانیی نێوده‌وڵه‌تیی دژی داعشدا هاوكاری زۆری پێشمەرگەی كردووە و دەشڵێت: عێراق و هەرێم پێویستیان بە پشتگیری نێودەوڵەتییە بۆ كۆتایی هێنانی یەكجاری بە داعش.
سه‌رۆكایه‌تی هه‌رێمی كوردستان بڵاویكرده‌وه، له میانی به‌شداریكردنی له كۆنفرانسی ئاسایشی میونشندا، به‌یانیی ئه‌مڕۆ هه‌ینی، 2025/2/14 نێچیرڤان بارزانی، سه‌رۆكی هه‌رێمی كوردستان له كۆبوونه‌وه‌یه‌كدا له‌گه‌ڵ گویدۆ كرۆسێتۆ، وه‌زیری به‌رگریی ئیتاڵیا، په‌یوه‌ندییه‌كانی هه‌رێمی كوردستان و ئیتاڵیا و به‌هێزكردنی هاریكاریی هاوبه‌شی نێوان هه‌ردوولا و به‌ره‌نگاربوونه‌وه‌ی هه‌ڕه‌شه‌كانی داعشیان تاوتوێ كرد.
نێچیرڤان بارزانی پێزانینی هه‌رێمی كوردستانی بۆ ئه‌و پشتگیرییه دووپات كرده‌وه كه ئیتاڵیا له بواری ڕاهێنانی هێزه‌كانی پێشمه‌رگه و به‌هێزكردنی تواناكانی له چوارچێوه‌ی هاوپه‌یمانیی نێوده‌وڵه‌تیی دژی داعشدا پێشكه‌شی ده‌كات، هه‌روه‌ها داكۆكی له پێویستیی عێراق و هه‌رێمی كوردستان به به‌رده‌وامیی پشتگیریی نێوده‌وڵه‌تی بۆ نه‌هێشتنی یه‌كجاره‌كیی داعش كرده‌وه.
لای خۆیه‌وه، وه‌زیری به‌رگریی ئیتاڵیا جه‌ختی له‌سه‌ر گرنگیی هاوبه‌شیی له‌گه‌ڵ هه‌رێمی كوردستان و پابه‌ندیی وڵاته‌كه‌ی بۆ به‌رده‌وامیی پشتگیریی پێشمه‌رگه و به‌هێزكردنی هاوكاریی سه‌ربازی و ئه‌منی له‌گه‌ڵ عێراق و هه‌رێمی كوردستاندا كرده‌وه، هه‌روه‌ها ستایشی ڕۆڵی هه‌رێمی كوردستانی كرد له پاراستنی سه‌قامگیری له ناوچه‌كه‌دا.
دوایین پێشهاته ئه‌منی و سیاسییه‌كانی عێراق و ناوچه‌كه، به‌تایبه‌تی دۆخی سوریا و چه‌ند پرسێكی دیكه‌ی جێی بایه‌خی هاوبه‌ش، ته‌وه‌رێكی دیكه‌ی كۆبوونه‌وه‌كه بوو.
