سەرۆكی فەڕەنسا لە كۆنگرەی نیشتمانی تایبەت بە سووریا، كە لە پاریس ئەنجام دەدرێت “هەسەدە”ی وەك هاوپەیمانی وڵاتەكەی ناوبرد و ڕایگەیاند،
ئیمانوێل ماكرۆن، سەرۆكی فەڕەنسا لە وتاری تایبەتدا لە كۆنگرەكە ڕووی كردە بەرپرسانی ئێستای سووریا و وتی، “سەبارەت بە دۆخی ئەمنی، دەمەوێت ئەوەتان پێ بڵێم سەبارەت بە وەفامان بۆ هێزەكانی سووریای دیموكرات، كە زۆریان پێشكەش كرد و بوونەتە هاوپەیمانێكی بەنرخی ئێمە لە شەڕی دژی داعش”.
ڕاشیگەیاند، ئێمە بەوەفاین بۆ ئەو هاوپەیمانەمان، چونكە دەزانین، كە هەموومان قەرزداری ئەوانین.
ئاماژەی بەوەشكرد، هێزەكانی سوریای دیموكرات بە ئازایەتییەوە شەڕیان كرد لەپاڵ هاوپەیمانی نێودەوڵەتی، كە ئێمەش بەشێك بووین لەو هاوپەیمانیەتییە، بۆیە پێمان وایە لەم كاتەدا پێویستە لەسەرمان پارێزگاری لە بەرژەوەندییەكانیان بكەین و دەستبەرداریان نابین.
ماكرۆن وتیشی، “دەمەوێت ئەوەتان پێ بڵێم، كە هێزەكانی سووریای دیموكرات بكرێنە بەشێكی تەواو لە قۆناغی ڕاگوزەری سووریا، كە ئەوەش ئامانجی ئەمنی ئێوە دەپێكێت، چونكە هەسەدە جەنگاوەری بەهێزن و ئەوەش بەرپرسیارێتی ئێوەیە ڕێگەیان پێ بدەن بۆ یەكخستنی هێزەكانیان بۆ بەدیهێنانی ئەو ئامانجە”.
جەختیشی كردەوە، دەبێت كاربكرێت بۆ تێكشكاندنی ئەو گرووپە تیرۆرستیانەی ئاسایش و سەقامگیری سووریا تێكدەدەن.
