بەپێی ڕێككەوتنەكەی نێوان هەرێم و عێراق، یاسای خانەنشینی یەكگرتو وەك خۆی و بەسەر هەموو خانەنشینانی هەرێمدا جێبەجێ دەكرێت، ئەو كەسانەشی لە ساڵی (2022) خانەنشین كراون مووچەكەیان هاوتای بەغدا دەكرێت و پاداشتی كۆتایی خزمەت كە پێدانی (12) مووچەی خانەنشینییە بەسەریەكەوە وەردەگرن.
سادق شێخ عوسمان، وتەبێژی یەكێتی خانەنشینانی كوردستان ڕایگەیاند، بەپێی ئەو ڕێككەوتنەی لەنێوان وەزارەتی دارایی هەرێم و وەزارەتی دارایی فیدڕاڵدا ئەنجام دراوە، یاسای ژمارە (9)ـی خانەنشینی یەكگرتوو وەك خۆی و بەسەر هەموو خانەنشینانی هەرێمدا جێبەجێ دەكرێت.
ڕاشیگەیاند، یاساكە گرنگی زۆری هەیە، چونكە جیاوازی نێوان مووچە بەرز و نزمەكانی كەم كردۆتەوە، هەر لەبەر ئەوەشە پێی دەوترێت خانەنشینی یەكگرتوو كە بەدڵنیاییەوە ئەو فەرمانبەرانەی پێش ساڵی (2022) خانەنشین بوون، مووچەیان هاوتای بەغدا دەكرێت و بەو جۆرەش بەردەوام دەبێت.
سەبارەت بە پاداشتی كۆتایی خزمەت كە پێدانی (12) مووچەی خانەنشینییە بەسەریەكەوە، وتەبێژی یەكێتی خانەنشینان وتی، “دوای تەواوكردنی مامەڵەی خانەنشینی بۆ ئەو كەسانەی كە لە مانگی (12ـی 2023) خانەنشین بوون، كە پێدەچێت مامەڵەكەیان نزیكەی دوو مانگ بخایەنێت (12) مووچەكەیان بەسەر یەكەوە وەردەگرن”.
دەربارەی خانەنشینی پێشمەرگە، ئاشكرای كرد، كە بەپێی یاسای ژمارە (9)ـی خانەنشینی یەكگرتوو، چۆن بۆ ئەفسەرێكی سوپای عێراق جێبەجێ دەكرێت، هاوشێوەش بۆ هێزەكانی پێشمەرگە جێبەجێ دەكرێت، بەڵام بەهۆی فرە جۆری لە خانەنشینی پێشمەرگەدا كەمێك گرفتی بۆ جێبەجێ كردنی بڕیارەكە دروستكردوە، كە بەدڵنیاییەوە ئەوەش چارەسەر دەكرێت.
وەزارەتی دارایی عێراق و هەرێم ڕێككەوتن لەسەر جێبەجێ كردن و هاوتاكردنی مووچەی سەرجەم خانەنشینانی هەرێم لەگەڵ عێراق بۆ هەموو ئەو خانەنشینانەش، كە پێش دەرچوونی بڕیاری دادگای فیدڕاڵی خانەنشین بوون.
