مامۆستایەكی زانكۆ و شارەزای ئابووری و بانكی ڕایدەگەیەنێت، حكومەتی هەرێم دوای ڕاگرتنی پلەبەرزكردنەوە، خشتەی هەمواركراوی مووچەی عێراق بەركاردەكات و بەوەش مووچەی بنەڕەتی فەرمانبەران كەم دەبێتەوە.
گوڵاڵە سدیق، مامۆستای زانكۆ و شارەزای ئابووری و بانك لە پەرەی فەرمی خۆی لە فەیسبووك ئاشكرای كردووە، حکومەتی هەرێم بەبێ گەڕاندنەوەی پلەبەرزکردنەوەی موچەخۆران،
وە پاش زیادکردنی لێبڕینی خانەنشینی لە ٧% بۆ ١٠%، ئێستا حکومەتی هەرێم خەریکی بەکارخستنی خشتەی مووچەی عێراقە، کە بەپێی بڕیاری ژمارە ٤٠٠ ساڵی ٢٠١٥ ی هەموارکراو، بڕی مووچەی بنەڕەتی کەم دەکات!
دەشڵێت: واتە حکومەتی هەرێم، بۆ مووچەی بنەڕەتی و لێبڕینی خانەنشینی هاوتای بەغدادی دەکات، بەڵام بۆ پلەبەرزکرنەوە هاوتای بەغدادی ناکات!
ئەمە لەكاتێكدایە، كە ماوەی 10 ساڵە پلەبەرزكردنەوەی فەرمانبەرانی مەدەنی لە هەرێم ڕاگیراوە، كە بەوهۆیەوە هەر فەرمانبەرێك دوو پلەی فەوتاوە و بەوەش مانگانە زیاتر لە 100 بۆ 150 هەزار دینار كەمتر لە شایستەی خۆی وەردەگرێت، هاوكات لە مانگی 7ی ئەمساڵیشەوە لێبڕینی خانەنشینی لە 7%ی مووچەی بنەڕەتییەوە بۆ 10% زیادكراوە و بەوەش لێبڕینی مووچە زیاتر بووە.
