سەرۆکی هەرێمی کوردستان و سەرۆکی یەکێتیی نیشتمانیی کوردستان بەشداری لە کۆنفرانسی ئاسایشی میونشندا دەکەن کە سێ ڕۆژ دەخایەنێت.
ئەمڕۆ پێنجشەممە، دڵشاد شەهاب، وته‌بێژى سه‌رۆكايه‌تيى هه‌رێمى كوردستان ڕایگەیاند، نێچيرڤان بارزانى سەرۆکی هەرێمی کوردستان بۆ بەشداریکردن لە کۆنفرانسی ئاسایشی میونشن گەیشتە ئەڵمانیا.
ڕوونیشیکردەوە کە نێچيرڤان بارزانى له ميانى سێ ڕۆژى كۆنفرانسه‌كه‌دا، له‌گه‌ڵ ژماره‌يه‌ك له سه‌ركرده و به‌رپرسانى باڵاى وڵاتان، چه‌ندين ديدار و كۆبوونه‌وه‌ى ده‌بێت و ده‌رباره‌ى په‌يوه‌ندييه‌كانى هه‌رێمى كوردستان و عێراق له‌گه‌ڵ وڵاتان و دوا پێشهاته‌كان له ناوچه‌كه، گفتوگۆ ده‌كات و بيروڕا ده‌گۆڕێته‌وه.
لە لایەکی دیکەشەوە میدیای یەکێتی بڵاویکردەوە کە بافڵ تاڵەبانی، سەرۆکی یەکێتیی نیشتمانیی کوردستان بەشداری کۆنفرانسەکە دەکات و “بڕیارە لە سەردانەکەیدا چەندین کۆبوونەوە و دیدارى سیاسی و دیپلۆماسی لەسەر ئاستی بەرپرسانی باڵای وڵاتان و سەرکردەی سیاسی، سەربازی، ئەمنی و ئابووری ئەنجام بدات”.
لە کۆنفرانسەکەدا زیاتر لە 200 سەرۆک، سەرکردە، سەرۆک وەزیران و وەزیری وڵاتان بەشدارن، ئەجێنداکەشی بۆ گفتوگۆکردنە لەسەر قەیران و ئاڵنگارییە ئەمنییەکانی جیهان، داهاتووی حکومڕانی جیهان، ئاسایشی کەشوهەوا و رۆڵی ئەورووپا لە جیهان.
