ئاسایشی شارەزوور پێنج کەسی بە تۆمەتی بازرگانیکردن بە شوێنەوار دەستگیرکرد کە زیاتر لە 1400 سکەیان پێ بووە.
دەزگای ئاسایش ڕایگەیاند، لەماوەی دوومانگی ڕابردوودا، بەڕێوەبەرایەتی ئاسایشی شارەزوور، دوای چاودێریکردن و کۆکردنەوەی زانیاری ورد و ئەنجامدانی لێکۆڵینەوە، لە دوو چالاکی جیادا، بۆ بەرەنگاربوونەوەی هەموو جۆرە مامەڵە و بازرگانیکردنێک بەپارچە شوێنەوارییەکان و پاراستنی و ڕێگریکردن لەگەڕان و پشکنینی نایاسایی ناوچە شوێنەوارییەکان، بەفەرمانی دادوەری لێکۆڵینەوەی ئاسایش لەپارێزگای هەڵەبجە و قەزای سەیدسادق توانیان پێنج تۆمەتباری شوێنەوار دەستگیر بکەن.
ڕوونیشیکردەوە کە لەچالاکی یەکەمدا، هێزەکانی ئاسایش بەهاوکاری کۆماندۆی کوردستان توانیان دەست بەسەر بڕی 1444 سکەی جۆراوجۆری شوێنەواردا بگرن.
ڕاشیگەیاند کە لەچالاکی دووەمدا، هێزەکانی ئاسایش توانیان دەستبگرن بەسەر سێ ئامێری پشکنینی ناوچە شوێنەوارییەکان.
ئاسایش ئەوەشی خستەڕوو کە ئێستا تۆمەتباران بەماددەی (24)ی شوێنەوار دەستگیرکراون و لێکۆڵینەوە لە دۆسیەکانیان بەردەوامە.
