سوپای تورکیا، بۆردوومانی گوندەکانی بناری قەندیل و قەزای پشدەر دەکات.

ماوەی دوو ڕۆژە تورکیا بۆردومانی گوندەکانی سنووری قەزای پشدەری کردووە و زیانێکی زۆری بەر ژینگەی ئەو ناوچانە گەیاندووە.

کامەران عوسمان، ئەندامی ڕێکخراوی CPT ڕایگەیاند، لە بەرەبەیانی دوێنێوە، سوپای تورکیا حەوت جار بۆردوومانی گوندەکانی سنووری قەزای پشدەری کردووە.

ئاماژەی بەوەشدا، دوێنێ کاتژمێر 5:40 خولەکی سەرلەبەیانی، فڕۆکە جەنگییەکانی تورکیا بۆردوومانی گوندی ئێندزە، بێپاڵان، کۆمتان و کورتەکی کرد لە قەزای پشدەر، هاوکات  پێشنیوەڕۆی ئەمڕۆش، لە کاژمێر10:35 خولەکدا، فڕۆکە جەنگییەکانی تورکیا بۆردوومانی هەر یەک لە گوندەکانی ئەبوبەکرە و قەڵاتووکانیان کرد لە سنوری قەزای پشدەر.

ڕوونیشیکردەوە، ماوەی دوو ڕۆژە، فڕۆکە جەنگییەکانی تورکیا بە نزمی بەسەر قەزای پشدەر و ئیدارەی ڕاپەڕیندا دەسوڕێنەوە.

لەبارەی زیانەکان، کامەران عوسمان رایگەیاند، هیچ هاووڵاتییەکی مەدەنی نەبوونەتە قوربانی بۆردوومانەکانی دوو ڕۆژی ڕابردوو، بەڵام زیان بەر ژینگە و دارستانەکانی ناوچەکە کەوتووە.