کەشناسی: کڕیوە چەند ناوچەیەکی هەرێمی کوردستان دەگرێتەوە

کەشناسی هەرێمی کوردستان ڕایگەیاند شەپۆلێکی بەفر و باران دەستپێدەکات و لە چەند ناوچەیەکیش بەفر دەبارێت.

بەڕێوەبەرایەتی کەشناسی و بوومەلەرزەزانی هەرێمی کوردستان ڕایگەیاند، ئەمڕۆ پێنجشەممە، شەپۆلێکى بەفر و باران ڕوو لە ناوچەکەمان دەکات، لە دوای نیوەڕۆوە بارانبارین لە پارێزگای دهۆك و ئیدارەی زاخۆ بە شێوەی نمە باران و بارانی مامناوەند دەست پێدەكات و پاشان كاریگەریەكەی درێژ دەبێتەوە بۆ ئیدارەی سۆران و ڕاپەرین و پارێزگای هەولێر و لە ناوچە شاخاوییەكانی باكورو باكوری ڕۆژهەڵاتی هەرێمیش بەفر و و كڕێوە دەبارێت.

ڕوونیشیکردەوە کە بۆ درەنگانی شەو و بەرەبەیانی ڕۆژی هەینی باران بارین تەواوی هەرێمی كوردستان دەگرێتەوە و بەفر لە زۆربەی ناوچە شاخاوییەكان دەبارێت، هەروەها پێشبینی دەكرێت بەفر لە سەنتەری پارێزگای دهۆك و پارێزگای سلێمانی و قەزا و ناحیەكانی ئەو دوو پارێزگایە و ئیدارە سەربەخۆكان ببارێت.

سەبارەت بە سبەینێ هەینیش کەشناسی ڕایگەیاند، لە كاتەكانی بەیانیدا نمە باران و بارانی مامناوەند بە پچڕپچڕی دەبارێت. بەفریش لە ناوچەكانی پارێزگای دهۆك و پارێزگای سلێمانی و پارێزگای هەڵەبجە و ئیدارەی سۆران و ڕاپەڕین دەبارێت و بەفربارین لە ناوچە شاخاوییەكانیش زیاتر دەبێت.

کەشناسی ئەوەشی خستەڕوو کە بۆ كاتەكانی شەو كاریگەری ئەو شەپۆلە لەسەر ناوچەكەمان كۆتایی دێت.

بەرزترین پلەکانی گەرمای پێشبینیکراو بە پلەی سیلیزی:

هەولێر: 11 پلەى سیلیزى

سلێمانی: 9 پلەى سیلیزى

دهۆک: 9 پلەى سیلیزى

کەرکووک: 13 پلەى سیلیزى

زاخۆ: 9 پلەى سیلیزى

هەڵەبجە: 10 پلەى سیلیزى

حاجی ئۆمەران: 3- پلەى سیلیزى

سۆران: 8 پلەى سیلیزى

گەرمیان : 17 پلەى سیلیزى