دادگای باڵای فیدراڵیی عێراق سكاڵای سەرۆك كۆماری عێراقی لەسەر هەریەكە سەرۆك وەزیران و وەزیری دارایی بۆ 18ی ئەم مانگە دواخست، كە لەسەر دواكەوتنی مووچەی فەرمانبەرانی هەرێمی كوردستان و تەوتین تۆماری كردبوو.
سەرۆکایەتیی کۆماری عێراق، یەک شەممەی رابردوو سکاڵایان لەسەر محەمەد شیاع سودانی و تەیف سامی، لە دادگای فیدڕاڵی تۆمار کرد، سەرەڕای ئەرکەکانیان وەک سەرۆک وەزیرانی عێراق و وەزیری دارایی تایبەت بە دواكەوتنی مووچە و تەوتینی مووچەی فەمرانبەرانی هەرێم.
ئەمڕۆ دادگای باڵای فیدڕاڵی عێراق كۆبووەوە و بڕیاریدا دادگاییەكە بۆ 18ی ئەم مانگە دوابخات.
هاوڕێ تۆفیق، راوێژکاری سەرۆک کۆماری عێراق و بەرپرسی گشتی پەیوەندییەکان لە سەرۆکایەتی کۆمار، لە کۆنگرەیەکی رۆژنامەوانیدا کە لە کۆشکی سەلام لە بەغدا ئەنجامی دا، یەكشەممەی رابردوو وتی، ناوەڕۆكی سكاڵاكە چەند خاڵێكی سەرەكییە، یەكەمیان داواكراوە دادگای فیدراڵی فەرمانی بەپەلە دەربكات بۆ خەرجكردنی موچەی موچەخۆرانی هەرێمی كوردستان بە شێوەیەكی بەردەوام و بەبێ راوەستان.
سەرۆکایەتی کۆمار لە سکاڵاکەیدا، داوا دەکات، بابەتە هونەرییەكانی وەك میزانی موراجەعە، وردەكاری و چاودێری كە ئەمانە رێكاری كارگێڕی و هونەرین، نەبنە هۆكارێك بۆ دواخستنی موچە، لەهەمان كاتدا داواكراوە لەلایەن دادگاوە ئەنجومەنی نوێنەران پابەند بكرێت بە هەمواركردنی (مادەی 12/بڕگەی ج) لە یاسای بودجەی فیدڕاڵی كە تایبەتە، بە تێچووی بەرهەمهێنانی بەرمیلێك نەوت بۆ هەرێمی كوردستان.
