پاپا فرەنسیس، پاپای کڵێسای کاسۆلیکی و سەرۆکی ڤاتیکان، ڕەخنەی توندی لە سیاسەتەکانی سەرۆکی ئەمریکا، دۆناڵد ترەمپ گرت سەبارەت بە کۆچبەران و ھۆشداری دا لەوەی کە دیپۆرتکردنەوەی کۆچبەران، تەنھا لەبەر دۆخی نایاساییان، زیان بە کەرامەتی ئەوان دەگەیەنێت.
سەرۆکایەتی ڤاتیکان لە ڕاگەیاندراوێکدا ئاماژەی بەوەداوە کە پاپا فرەنسیس نامەیەکی سەبارەت بە سیاسەتەکانی دۆناڵد ترەمپ لەبارەی کۆچبەرانەوە، ئاراستەی قەشەکانی ئەمریکا کردووە.
پاپا فرەنسیس بەبێ ئەوەی ناوی بھێنێت، ئاماژەی بە سیاسەتەکانی دۆناڵد ترەمپ لەبارەی کۆچبەرانەوە داوە و ڕایگەیاندووە، ئەو لە نزیکەوە چاودێری ئەو قەیرانە گەورەیە دەکات کە لەگەڵ دەستپێکردنی پرۆگرامی دیپۆرتکردنەوەی بەکۆمەڵ لە ئەمریکا سەریھەڵداوە.
جەختی لەوەش کردووەتەوە کە دیپۆرتکردنەوەی کۆچبەران، تەنھا لەبەر دۆخی نایاساییان، زیان بە کەرامەتی ئەوان دەگەیەنێت، چونکە ئەو کۆچبەرانە بەھۆی کەمدەرامەتی، نائارامی و چەوساندنەوە ماڵوحاڵی خۆیان جێھێشتووە.
ڕاشیگەیاندووە: “چاکەی گشتی ڕاستەقینە کاتێک بەدی دێت کە کۆمەڵگا و حکوومەتەکان دان بە مافەکانی ھەموو تاکەکاندا بنێن و بیانپارێزن”.
