دابه‌شكردنى به‌شه‌خۆراكی مانگی 10ی ساڵى 2024 و ئاردی مانگی یەکی ئەمساڵ له كۆتاییدایه‌و ده‌ست به‌دابه‌شكردنى به‌شه‌خۆراك و ئاردى نوێ ده‌كرێت، بەڕێوەبەری گشتی بازرگانی هەرێمیش زانیاری زیاتر دەدات.
نه‌وزاد شێخ كامیل، به‌ڕێوبه‌رى گشتیی بازرگانیی هه‌رێم به “تۆڕی میدیایی خەڵک”ی ڕاگەیاند: دابه‌شكردنى به‌شه خۆراكی مانگى 10ى ساڵى رابردوو له كۆتاییدایه و به‌ره‌و ته‌واوبوون ده‌چێت و ئامادەکاری بۆ دابەشکردنی سەبەتەی خۆراکی مانگی یەکی ئەمساڵ دەکەن.
باسی لەوەشکرد: “به‌شه‌ئاردی مانگى یەکیش لە کۆتاییدایە، هەولێر و دهۆک دابەشکراوە، تەنها بەشێکی کەمی سلێمانی ماوە دابەش بکرێت”.
ئەوەشی خستەڕوو: “لە ئامادەکاریدان بۆ دابەشکردنی بەشە ئاردی مانگی دوو، بۆ ئەو مەبەستەش گه‌نم ڕه‌وانه‌ى ئاشه‌كان دەکەن تا كرێته ئارد و دابه‌شبكرێت”.
لە بارەی دروستکردنی ماستەرکارد بۆ بریکارەکانی دابەشکردنی خۆراک لە هەرێم، بەڕێوەبەری گشتی بازرگانی هەرێم وتی: “سەرجەم بریکارەکان ئاگادار کراونەتەوە و ماستەرکارتیان بۆ دروست دەکەین، بۆ ئەوەی بەشێوەی ئەلیکترۆنی پارەکانیان بدەنە وەزارەتی بازرگانی عێراق.
