وەزارەتی شارەوانی و گەشتوگوزاری هەرێم، بڕی زیاتر لە 600 ملیۆن دیناری بۆ جێبەجێکردنی ژمارەیەک پڕۆژەی خزمەتگوزاری لە هەولێر تەرخان کرد.
وەزارەتەکە، ئەمڕۆ چوارشەممە بڵاویکردەوە: لە فەرمانێكی وەزاریدا، ڕەزامەندی لەسەر خەرجكردنی گوژمەی 611 ملیۆن و 166 هەزار دیناردا بۆ جێبەجێكردنی ژمارەیەك پرۆژەی خزمەتگوزاری لە شاری هەولێر.
باسی لەوەشکردووە: گوژمەكە لەسەر ڕێژەی 15%ی داهاتی شارەوانییە لە سنووری سەرۆكایەتیی شارەوانیی هەولێر و بەمەبەستی جێبەجێكردنی ئەو پرۆژانەی كە خوارەوە ئاماژەیان بۆ كراوە فەرمانی وەزاری بۆ دەركراوە.
لە بارەی پڕۆژەکانەوە هاتووە: پرۆژەی دروستكردنی چەند شەقامێك لە گەڕەكی سەربەخۆیی، كڕینی كەرەستە و گازوایل بۆ بەرهەمهێنانی تێكەڵە و تێكەڵەی ئەسفەڵتی بۆ قیرتاوكردن و نۆژەنكردنەوەی شەقامەكان، فراوانكردنی شەقام لە گەڕەكی زانكۆ، تێكەڵەڕێژكردنی شەقامی 20مەتری و 15مەتری لە گەڕەكی سەربەخۆیی، قیرتاوكردنی شەقام لە نێوان گوندی سێبەردان و كەرتی 10000 لە سنووری شارەوانیی سێ.
دەشڵێت: جگە لەو پرۆژانە، ئێستا لە سنووری سەرۆكایەتیی شارەوانیی هەولێر، ژمارەیەك پرۆژەی دیكەی خزمەتگوزاری لە قۆناغی جێبەجێكردندان و بۆ ئەمساڵیش بەپێی پلانی شارەوانی، پرۆژەی دیكەی خزمەتگوزاری دەكەونە بواری جێبەجێكردنەوە.
