وەزارەتی پەروەردە داوای كۆمەڵێك زانیاریی تایبەت بە مامۆستایانی گرێبەست دەكات، كە باسی مووچە و كارتی بانكییشی تێدایە، بەرپرسێکی وەزارەتەکەش دەڵێت، “وەک فەرمانبەر و مامۆستای هەمیشەیی هەژماری بانکی بۆ مامۆستایانی گرێبەستیش دەکرێت”.
وەزارەتی پەروەردەی حكومەتی هەرێمی كوردستان، لە نووسراوێكدا، كە 11ی ئەم مانگە دەرچووە، بۆ بەڕێوەبەرایەتییە گشتییەكانی پەروەردەكان نێردراوە، تیایدا داوای ژمارەیەك زانیاریی تایبەت بە مامۆستایانی گرێبەست دەكات.
ئەوەش خراوەتە ڕوو، كە دەبێت چەند زانیارییەك هەیە بۆ مامۆستایانی گرێبەستی حكومی لە سیستەمی (ئی، پەروەردە) بە دروستی پڕ بكرێنەوە.
داوا كراوە ناوی چواریی مامۆستایانی گرێبەستی حكومی بە كوردی و ئینگلیزی بنووسرێت و ئاماژە بە ناوی سیانیی دایكیشیان بكرێت.
وەزارەتی پەروەردە داواشی كردووە، بەروار و شوێنی لەدایكبوونی مامۆستا بنووسرێت و جەختیش كراوەتەوە: “ژمارەی كارتی نیشتمانی، یان ژمارەی ناسنامەی باری شارستانی و رێكەوتی دەرچوون و بەسەرچوونی لەگەڵ زانیارییەكان بێت”.
هەروەک داواشكراوە، شوێنی نیشتەجێبوون، باری خێزانی، مووچەی مانگانە، ژمارەی مۆبایل، یان ئیمێلی بنووسرێت.
بەپێی نووسراوەكە، دەبێت مامۆستای گرێبەست ناوی ئەو بانكە بنووسێت، كە كارتی (هەژماری من)ی دەوێت و دیاریش بكات حسابی لەو بانكە هەیە یان نا.
وەزارەتی پەروەردە جەختی كردووەتەوە، دەبێت تا 20ی شوباتی 2025، ئەو زانیارییانە لە سیستەمی (ئی، پەروەردە) لە لایەن بەكارهێنەری قوتابخانەكان تۆمار بكرێن.
لای خۆیەوە جەسام موشیر، بەڕێوەبەری گشتیی فێركردنی بنەڕەتی، لە وەزارەتی پەروەردەی حكوومەتی هەرێمی كوردستان، بە میدیای پارتی ڕاگەیاند: “ئەو زانیارییانە دەبێ لە سیستەمی (ئی پەروەردە) لەلایەن بەکارهێنەری قوتابخانەکان بە دروستی داخیل بکرێت”.
ئاماژەی بەوەش دا: “وەک فەرمانبەر و مامۆستای هەمیشەیی هەژماری بانکی بۆ مامۆستایانی گرێبەستیش دەکرێت”.
