دوو سەرچاوەی باڵای ئاسایشی و سەربازی لە پارێزگای سەڵاحەدین دەڵێن، جموجۆڵی چەکدارانی داعش لە سنوری کەرکووک و سەڵاحەدین زۆر زیادیکردووە، بە جۆرێک چەکدارەکان جلی سەربازی دەپۆشن و چەکی پێشکەوتووشیان پێیە.
دەنگی ئەمریکا لە زاری دوو سەرچاوەی باڵا سەربازییەوە بڵاویکردەوە کە چەکدارانی داعش بەڕێگەی نێوان کەرکووک و سەڵاحەدیندا هاتووچۆ دەکەن.
یەکێک لە سەرچاوەکان ڕایگەیاندووە کە “بەشێکی تری چەکدارانی داعش لە پارێزگای دیالەوە دەپەڕنەوە بۆ ناوچەی تاوێرکەوەی سنوری قەزای خورماتوو.”
ناوچەی تاوێر کەوە، ناوچەیەکی شاخاوی و پڕ لە حەشارگەی سەختی چەکدارانی داعشە، بە پێی وتەی بەرپرسانی ئاسایشی و سەربازی، ئەم ناوچەیە هیچ جوڵەیەکی سەربازی عێراقی تێدا نییەو لە ژێر کۆنترۆڵی داعشدایە، بەڵام ناو بە ناو لەلایەن فڕۆکە عێراقییەکانەوە بۆردومان دەکرێت.
بە وتەی سەرچاوەی دووەمیش “بەشێک لە چەکدارانی داعش و سەرکردەکانیان ناسنامەیان لای دەزگا ئاسایشییەکان ڕوونە، ئەوان لەسەردەمی بەعسدا کاری قاچاخچێتیان کردووە. داعش ناو بە ناو گۆڕانکاری لەسەرکردەکانی دەکات و جێگۆڕکێ بە هێزەکانیش دەکات.”
ئێوارەی دوێنێ دووشەممە، فڕۆکە عێراقییەکان ناوچەی غەڕەو پەڵکانەی نزیک قەزای خورماتووی پارێزگای سەڵاحەدینیان بۆردومان کرد و چەند چەکدارێکی ئەو ڕێکخراوە کوژران.
ڕۆژی شەممەی ڕابردووش فەرماندەیی ئۆپەراسیۆنە هاوبەشەکانی عێراق ڕایگەیاند، لە هێرشێکی ئاسمانیدا بۆ سەر حەشارگەیەک لە ناوچەی زەرگەی سنوری قەزای خورماتوو، حەوت چەکداری داعش کوژراون، یەکێک لە کوژراوەکان ئەبو سەعید ئەلدەندوسی والی کەرکووکی ڕێکخراوەکە بووە.
نازم کەهیە، ڕێکخەری پێشووی پەیوەندییەکانی نێوان پێشمەرگەو حەشدی شەعبی لە باشوری کەرکووک، بە دەنگی ئەمریکای ڕاگەیاند،”جموجۆڵی داعش زۆر زیادیکردووە، چەکدارانی داعش لە گوندە عەرەب نیشینەکان حەشارگەیان هەیە.”
جموجۆڵی چەکدارانی داعش کە بەچڕی لەلایەن دەزگا ئاسایشی و سەربازییەکانی عێراقەوە چاودێری دەکرێت لەکاتێکدایە، بەرپرسانی باڵای حکومەتی عێراقیش پێیانوایە هێشتا داعش مایەی مەترسییە لەسەر ئاسایش و سەقامگیری ناوچەکە.
پێشتریش فوئاد حسێن، وەزیری دەرەوەی عێراق، ڕایگەیاند،”جوڵەی داعش لە سنووری عێراق و سووریا جێگەی نیگەرانییە و پێویستە بە وریاییەوە مامەڵە لەگەڵ دۆخی ئەو سنوورانە بکرێت، چونکە داعش هەڕەشەیەکی ئاسایشی مەترسیدارە بۆ سەر ناوچەکە.”
