شارەوانی سلێمانی ڕایگەیاند، داتای سەرجەم مۆڵەتە نیشتەجێبوون و بازرگانییەکانی زیاتر لە 35 ساڵی ڕابردوو بە ئەلیکترۆنی دەکرێن.
ئەمشەو سەرۆکایەتی شارەوانی سلێمانی ڕایگەیاند، لیژنەیەکی تایبەتیان پێکهێناوە بۆ کۆکردنەوە و ڕێکخستنی داتای هەموو مۆڵەتە نیشتەجێی و بازرگانییەکان لە ماوەی ساڵانی 1988 تا 2024.
ڕوونیشیکردەوە کە سەرجەم بڕیارەکانی ئەنجومەنی شارەوانیش کە لە دوای 2000ەوە دەرچوون، کۆدەکرێنەوە.
شارەوانی ڕایگەیاند، ئامانجی سەرەکی ئەم پڕۆژەیە پاراستنی مامەڵەکانی هاووڵاتییانە، لەڕێگای دروستکردنی داتابەیسێکی ئەرشیفی فەرمی کە هەموو مۆڵەت و بڕیارەکانی تێیدا تۆمار دەکرێن.
ئەم داتابەیسە وەک سەرچاوەیەکی یاسایی و پشتڕاستکراو کاردەکات، بۆیە هاووڵاتییان لەکاتی ونبوون یاخود لەناوچوونی بەڵگەنامەکانیان دەتوانن بە ئاسانی و بە هۆکاری یاساییەوە مامەڵەکانیان لە فەرمانگەکە وەربگرنەوە.
شارەوانی سلێمانی ئەوەشی خستەڕوو کە ئەم کارە بۆ دڵنیابوون لە جێبەجێکردنی یاساکان و پاراستنی مافەکانی هاووڵاتییانە، بە تایبەتی لە بواری مۆڵەت و بازرگانی و سەرۆکایەتیی شارەوانیی سلێمانی بەم هەنگاوە بەرەو سیستمێکی ڕوون و کارای بەڵگەنامەکانی پیشەدارییەوە دەڕوات.
