قوباد تاڵەبانی لە ئیمارات دوای بەشداری كردنی لە كۆبوونەوەی لوتكەی حكومەتەكان لەگەڵ بەرپرسانی باڵای ئەو وڵاتە كۆدەبێتەوە و جەخت لە گرنگی سوودوەرگرتن لە ئەزموونی ئەو وڵاتە دەكاتەوە لەبواری كەرتی نەوت و گاز و گواستنەوەی گشتی “پاس و ترام” بۆ هەرێمی كوردستان.
قوباد تاڵەبانی، جێگری سەرۆك وەزیرانی هەرێم لە ڕاگەیەنراوێكدا ئاماژەی بەوەكردووە، لە میانەی لوتکەی جیهانیی حکومەتەکان، لەگەڵ سەعید محەمەد ئەلتایەر، سەرۆکی کۆمپانیای نەوتی نیشتمانی ئیمارات (ENOC) و شاندێكی هاوڕێی لەبارەی ئەزموونی سەرکەوتووی ئەو وڵاتە لە کەرتەکانی نەوت و گازدا گفتوگۆمان كرد و دەرفەتەكانی گواستنەوەیمان بۆ كوردستان تاوتوێكرد.
ڕاشیگەیاندووە، هەر لەم لوتكەیەدا لەگەڵ مەتەر ئەلتایەر، سەرۆکی ئەنجوومەنی بەڕێوەبردنی دەستەی ڕێگاوبان و گواستنەوەی دوبەی (RTA) لە بارەی پرۆژەكانی ڕێگاوبان و چۆنێتیی سوودوەرگرتن لە ئەزموونی ئیمارات لە بواری گواستنەوەی گشتی (پاس و ترام) و سوودوەرگرتن لە شارەزایانی وڵاتەكەیان گفتوگۆمان كرد.
