ئەندامێکی مەکتەبی سیاسی پارتی ستایشی شکاندن و هەڵپەساردنی مانگرتن لە سلێمانی دەکات و دەڵێت” بڕیارێکی بەرپرسیارانە بوو و پەیامەکەیان گەیشتە هەمووان”.
هۆشیار زێباری، ئەندامی مەکتەبی سیاسی پارتی دیمەکراتی کوردستان، لەتۆڕی ئیکس بڵاویکردەوە، ئەو بڕیارەی ئەمڕۆ لەلایەن مامۆستایان و فەرمانبەرانی مانگرتوو لە سلێمانی درا بۆ هەڵپەساردنی مانگرتن، بڕیارێکی بەرپرسیارانە بوو و پەیامەکەیان گەیشتە هەمووان.
ئاماژەی بەوەشداوە، بەم بڕیارەیان هەوڵەکانی هەندێک لە ئەندام پەرلەمانی ڕاکردوو بەدوای ناوبانگ و پێگەدا پوچەڵکردەوە بۆ تیکدانی ئارامی و ئاسایشی هەرێم.
ئەم پەیامەی هۆشیار زێباری لەکاتێکدایە، دوێنی لەتۆڕی ئێکس پەیامێکی تری بڵاوکردەوە و نووسیبوی”ئەو مانگرتنەی لەم دواییانەدا لە سلیمانی ڕێکخراوە داوایەکی ڕەوایە و دەبێت ئەو مانگرتووانە خێمەکەیان بگوازنەوە بۆ مەیدانی تەحریر لە بەغدا یان بۆ شەقامی ئیمام لەبەردەم وەزارەتی دارایی عێراق بۆ داواکردنی ماف و شایستەکانیان، هەرچەندە لە ئێستادا حکومەتی هەرێم و بەغدا ڕێککەوتوون.
ئەمڕۆ دوای تێپەڕینی 15 ڕۆژ لە مانگرتن، لەسەر داوای زۆرینەی جەماوەر و خەڵکی پاڵپشت لە مانگران مانگرتنەکەیان هەڵپەسارد و بە ئەمبوڵانس بەرەو نەخۆشخانە بەڕێکران.
