كەشناسی هەرێم وادەی هاتنی شەپۆلێكی دیكەی بەفر و باران بۆ سەر ناوچەكەمان بڵاودەكاتەوە و ڕایدەگەیەنێت، بەهۆی هاتنی بارستە هەوایەكی ساردەوە پلەكانی گەرما زۆر دادەبەزن.
بەڕێوەبەرایەتی گشتی كەشناسی و بوومەلەرزەزانی هەرێم لە ڕاگەیەنراوێكدا ئاماژەی بەوەكردووە دوای نیوەڕۆی ڕۆژی پێنج شەممە ڕێکەوتی 13-2-2025 کەشی ناوچەکەمان دەگۆڕێت بۆ هەورو لەگەڵ هاتنی شەپۆلێکی بەفر بارین و باران بارین و دەست پێکردنی نمە باران لەسەرجەم ناوچە جیاجیاکان.
ئاماژەی بەوەشكرد، بارستە هەوایەکی سارد لە ناوەڕاستی ئەوروپاوە ڕوو لە ناوچەکەمان دەکات پلەکانی گەرما زیاتر نزم دەکاتەوە بە تایبەت لە ناوچە شاخاوییەکان، بۆیە شەپۆلێکی بەفر بارین سەرجەمی ناوچە سنوورییەکان و شاخاوییەکان دەگرێتەوە بە تایبەت ئەو ناوچە شاخاوییانەی بەرزیان لە (1000) مەترە بەفر بارینی دەبێت.
ڕوونیشی كردۆتەوە، لە سەنتەری پارێزگای سلێمانی و سەنتەری پارێزگای دهۆک بە تێکەڵی لەگەڵ باران بەفریش دەبارێت.
كەشناسی هەرێم دەڵێت: شێوازی دابارین نمە باران و بارانی مامناوەند دەبێت بڕی بارانی پێشبینیکراو بە گشتی لە نێوان (12-18) ملم دەبێ، زۆرترین کاتی بەفر بارین لە شەوی پێنج شەممە لەسەر هەینی و کاتەکانی بەرەبەیانی ڕۆژی هەینی.
جەختیشی كردۆتەوە، لە دوای نیوەڕۆی ڕۆژی هەینی کاریگەری ئەم شەپۆلە لاواز دەبێت لەسەر ناوچەکەمان، بەڵام پلەکانی گەرما هەر بە نزمی دەمێنێتەوە.
