سەرۆکی کۆمەڵی دادگەریی و ڕابەری گشتیی بزووتنەوەی پەیوەندی ئیسلامیی دەربارەی دەستپێکردنی “کارو پڕۆژەیەکی ئیسلامیی هاوبەش” کۆبوونەوە.
ئەمڕۆ سێشەممە، عەلی باپیر، سەرۆکی کۆمەڵی دادگەریی کوردستان بە یاوەری شاندێکی حزبەکەی سەردانی حاجی کامیل حاجی عەلی، ڕابەری گشتیی بزووتنەوەی پەیوەندی ئیسلامیی کرد.
مەکتەبی ڕاگەیاندنی عەلی باپیر بڵاویکردەوە کە لە کۆبوونەوەکەدا سەرۆکی کۆمەڵ دەستخۆشی لە بزووتنەوەی پەیوەندی کرد سەبارەت بەوەی لە هەڵبژاردنی کوردستان لە بازنەی هەڵەبجە هاوپەیمانیان لەگەڵ کۆمەڵی دادگەریی کرد.
ڕوونیشیکردە کە لە کۆبوونەوەکەدا “باسی لە گرنگیی هاوکاریی و هەماهەنگیی جیددی و کارای نێوان هەموو لایەنە ئیسلامییەکانی کوردستان کرد بە حزب و ڕێکخراو و دامودەزگاکان و هەموو ئاراستەکانیەوە، چونکە ئەوە لە ڕووی ئاینیی و سیاسییەوە کارێکی ڕەواو داواکراوە، بەرهەمی چاکی بۆ کارو پڕۆژەی ئیسلامیی دەبێت”.
هەر لەو دیدارەدا ڕابەری گشتیی بزووتنەوەی پەیوەندی “بە خۆشحاڵییەوە، پاڵپشتیی سەرنج و تێبینیەکانی کردن و، ئامادەباشیشی پیشاندا بۆ هەر کارو پڕۆژەیەکی ئیسلامیی هاوبەش کە خزمەت بە گۆڕەپانەکە بکات”.
کامیل حاجی عەلی، “کارکردنی پێکەوەیی بە کارێکی شەرعیی وگرنگ لە قەڵەم دا، بە تایبەت لە سۆنگەی ئەو گۆڕانکارییانەی ڕوو لە گۆڕەپانەکە دەکەن”.
لە ڕاگەیەندراوەکەی مەکتەبی عەلی باپیردا هاتووە کە “هەردوولا هاوڕابوون ڕێگەو میکانیزمی گونجاو بگیرێتە بەر بۆ هەر کارێک کە خزمەت بە گەل و نیشتیمان و ئایینەکەمان دەکات”.
