بڕیارە ئەمڕۆ دادگای فیدراڵی عێراق چارەنووسی یاساکانی باری کەسێتی، لێبوردنی گشتی و هەڵوەشاندنەوەی بڕیارەکانی ڕژێمی بەعس سەبارەت بە داگیرکردنی زەوی جوتیارانی کورد و تورکمان یەکلابکاتەوە.
بڕیارە ئەمڕۆ سێشەممە، دادگای فیدراڵی عێراق بەسەرۆکایەتی دادوەر محەمەد جاسم کۆبێتەوە بۆ یەکلاکردنەوەی ئەو سکاڵایانەی کە چەند پەرلەمانتاریك لە دژی پەسەندکردنی یاساکانی باری کەسێتی، لێبوردنی گشتی و هەڵوەشاندنەوەی بڕیارەکانی ڕژێمی بەعس سەبارەت بە داگیرکردنی زەوی جوتیارانی کورد و تورکمان پێشکەشیان کردووە.
پێشتر دادگای فیدراڵی فەرمانێکی وەلائی بۆ ڕاگرتنی کارکردن بەو یاسایانەی دەرکرد تا ئەو کاتەی سکاڵاکان یەکلادەکرێنەوە، بەڵام دادگای تێهەڵچوونەوەی فیدراڵی ڕایگەیاند، دەرکردنی فەرمانی وەلائی لە دەسەڵاتی دادگای فیدراڵیدا نییە.
لای خۆشیەوە محەمەد خەفاجی، ئەندامی لیژنەی یاسایی ئەنجومەنی نوێنەران ڕایگەیاند، لەم هەفتەیەدا سەرۆکایەتی کۆمار یاساکان پەسەند دەکات و دوات بڵاوکردنەوەی لە ڕۆژنامەی فەرمی (وەقائیعی عێراق)، دەچێتە بواری جێبەجێکردنەوە”.
ئەوەشی خستەڕوو کە پەسەندکردنی یاساکان لەلایەن سەرۆک کۆمارەوە لەگەڵ فەرمانە وەلائییەکەی دادگای فیدراڵیدا دژیەک نین، چونکە یاساکان بڵاودەکرێنەوە، بەڵام جێبەجێکردنیان ڕادەگیرێت.
شیعەکان لە یاسای لێبوردنی گشتی ناڕازین کە سوننەکان لێی سوودمەندن، بۆیە دەیانەوێت لە ڕێی دادگای فیدراڵییەوە هەڵیبوەشێننەوە.
