سەرۆکایەتی کۆمار ڕوونکردنەوە لەسەر سکاڵاکەی لە دژی سەرۆک وەزیران دەدات سەبارەت بە مووچەی فەرمانبەرانی هەرێمی کوردستان و داواش لە حکومەتی هەرێم دەکات پابەند بێت بە ڕادەستکردنی نەوت و داهات.
ئەمشەو هاوڕێ تۆفیق، بەڕێوەبەری گشتی لە سەرۆکایەتی کۆمار ڕاگەیەندراوێکی دەربارەی سکاڵاکەی سەرۆک کۆمار لە دژی سەرۆکی حکومەتی عێراق و وەزیری دارایی بڵاوکردەوە کە ئەمە دەقەکەیەتی:
به ناوی خوای بەخشندەی میهرەبان
سڵاو و ڕەحمەت و بەرەکەتی خوای گەورەتان لەسەربێت
دەمانەوێت بۆ هاووڵاتییانی عێراقی ئازیزمان روونی بکەینەوە کە وڵاتەکەمان بە قۆناغێکی گرنگدا تێدەپەڕێت و پێویستە هەمووان پابەند بن بە یەکڕیزی نیشتمانی و هەستکردن بەبەرپرسیارێتییەکی باڵا بەرامبەر بە پرسە گرنگەکان.
جەنابی سەرۆک کۆمار وەک پارێزەری دەستوور و سیمبولی یەکڕیزیی گەل لەگەڵ هەمووان لە یەک دووری دەوەستێت.
لەماوەی دەیان ساڵدا گەلی عێراقیمان خوێن و قوربانییەکی گەورەی داوە لەپێناو بەدیهێنانی سیستمێکی دیموکراتی نوێنەرایەتی فیدراڵی کە تێیدا شکۆمەندی و ژیانێکی خۆشگوزەرانی هەبێت.
هەمووان دەزانن کە یاسای بودجەی سێ ساڵیی فیدراڵی کە لەساڵی 2023 پەسەند کرا نەخشەڕێگایەکە بۆ دابەشکردنی سەروەت و سامانی عێراق بەسەر هاووڵاتیانی خۆیدا کە بەگوێرەی ئەو ماف و ئەرکانەی سەر حکومەتی فیدراڵی و حکومەتی هەرێم سەرهەڵدەدەن
بۆیە دەمانەوێت ئەمانەی خوارەوە بە ڕوونی و بە کورتی باس بکەین:
1. سەرۆکایەتی کۆمار پاڵپشتی سەرەکی حکومەتی فیدراڵی و حکومەتی هەرێمە لە دۆزینەوەی چارەسەری گونجاو بەپێی یاساکانی کارپێکراو و لەژێر چەتری دەستوور.
2 . سەرۆک کۆمار دژایەتی هیچ دەسەڵاتێکی دەستووری وڵات ناکات و ئەو سکاڵایەی سەرۆکایەتی کۆمار لەبەردەم دادگای فیدراڵی بۆ چارەسەرکردنی قەیرانی مووچەی فەرمانبەرانی هەرێمی کوردستانە لەهەستکردن بەبەرپرسیارێتی نیشتیمانی لەبەرامبەر ئازاری بەشێکی زۆری عێراقییەکان سەرچاوەی گرتووە و خۆپیشاندانی جەماوەری و مانگرتن لە خواردن بۆ کۆمەڵێک مامۆستا و فەرمانبەر کە بۆتە هۆی داخستنی چەندین قوتابخانە و پەکخستنی هەزاران خوێندکار و ئامانجی ئەم داوایە بۆ دۆزینەوەی چارەسەرێکی گونجاو و دەستوورییە لەنێوان حکومەتی فیدراڵدا و حکومەتی هەرێم وێڕای بەرزنرخاندنی هەموو هەوڵەکانی سەرۆک وەزیران لەگەڵ حکومەتی هەرێم بۆ دۆزینەوەی چارەسەرێک بۆ کێشە داراییەکان و تەئکیدیکردەوە لەسەر گرنگی پابەندبوونی حکومەتی هەرێم بەجێبەجێکردنی بڕگەکانی هەموارکردنی یاسای بودجەی فیدراڵی و ڕادەستکردنی داهاتی نەوت و غەیرە نەوتی خۆی بۆ حکومەتی فیدراڵی.
3. سەرۆک کۆمار لەڕێگەی ڕاپەڕاندنی ئەرکەکانییەوە و بەدواداچوونی بۆ ڕەوشی ژیانی هاووڵاتییان و سەردانەکانی بۆ پارێزگا ئازیزەکانمان (بەسرە و نەینەوا و هەولێر و نەجەف و واست و موسەننا و ئەنبار) هەمیشە پەرۆشە بۆ بەدیهێنانی مافەکانی گەلەکەمان بەهەموو پێکهاتەکانیەوە و گوێ لە دەنگ و داخوازییەکانیان دەگرێت .
لە کۆتاییدا سەرۆکایەتی کۆمار دامەزراوەیەکی دەستوورییە کە ئامانجی پاراستنی سیستەمی دەستووری، پاراستنی مافەکانی هەموو خەڵکە بەبێ جیاوازی و پشتیوانی لە هەموو دەسەڵاتەکان، تەئکید لەوە دەکاتەوە کە هەرکاتێک دەنگی گەلەکەمان یەکگرتوو بێت، وڵاتەکەمان خۆشگوزەرانی و بەختەوەری بەدی دەهێنێت.
