بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە یان برێم، کونسوڵی گشتیی فەڕەنسا لە هەرێم کرد و ڕایگەیاند، لەگەڵ ئەوەداین رێز لە ئیرادەو مافی هەموولایەک بگیرێت و کوردیش بەشێکی گرنگ بێت لە سووریای نوێدا.
بەپێی ڕاگەیەنراوی نووسینگەی سەرۆكی یەكێتی، بافڵ جەلال تاڵەبانی لەبارەی رێکخستنەوە و یەکڕیزی ماڵی کورد و یەکگووتاری سیاسی ڕایگەیاند، هەر بڕیارێک لەبەرژەوەندی چارەسەری کێشەکانی ژیانی خەڵک و هەرێمەکەمان بێت لەگەڵیداین، بەڵام دەبێت نیەتی جدی هەبێت بۆ کارکردنی پێکەوەیی و هاوبەشێتی ڕاستەقینە، چونکە هەر هەوڵێک لە دەرەوەی ئەم ویستە نیشتمانییە بە زیان بۆ گەلەکەمان دەشکێتەوە.
ڕاشیگەیاند،، ئەرکی هەمووانیشە بەرپرسیارانە لەگەڵ ئەم دۆخەدا مامەڵە بکەن و پێکەوە هەنگاوبنێن بۆ دروستکردنەوەی متمانە و پێکهێنانی حکومەتێکی خزمەتگوزار کە بە یەکسانی خزمەتی هەمووان بکات و لەئاست داواکاری خەڵکیشدابێت.
سەبارەت بە سووریا و ڕۆژئاوای کوردستان بافڵ جەلال تاڵەبانی وتی؛ “جەختدەکەینەوە، کە لەگەڵ ئەوەداین رێز لە ئیرادەو مافی هەموولایەک بگیرێت و کوردیش بەشێکی گرنگ بێت لە سووریای نوێدا، چونکە هەر پەراوێزخستنێک زیان بە ئارامی و ئاسایشی وڵاتەکە و ناوچەکەش دەگەیەنێت”.
