وتەبێژی پارتی: ئەوەی مانگرتووان داوای دەکەن لەمێژە حكومەت هەوڵی چارەسەركردنی دەدات

وتەبێژی پارتی دیموكراتی كوردستان ڕایدەگەیەنێت، یەكێتی و پارتی گەیشتوونەتە ئەو باوەڕەی دەبێت لە پێكهێنانی حكوومەت پەلە بكرێت و دەشڵێت: ناڕەزایی و ڕێپێوانی مامۆستایان و فەرمانبەران ڕێگەی پێدراوە، بەڵام “ئاستەنگی گەورە بەهۆی حكوومەتی عێراقەوەیە”.

مەحموود محەمەد، وتەبێژی پارتی دیموكراتی كوردستان بۆ میدیاكانی حزبەكەی ڕایگەیاند، گفتوگۆكان گەیشتوونەتە قۆناغی بیرۆكەی هاوبەش بۆ پێكهێنانی حكوومەت و تەنیا یەك دوو خاڵ ماون، كە پێویستی بە گفتوگۆ لە ئاستێكی دیكەدا هەیە و لە چەند ڕۆژی داهاتوودا گفتوگۆ دەكرێت و خاڵە ناكۆكەكان كۆتایی پێ دەهێندرێت.

ڕاشیگەیاند، هەردوو لا گەیشتوونەتە ئەو باوەڕەی دەبێت لە پێكهێنانی حكوومەت پەلە بكرێت و تەنیا ڕای جیاوازمان لەسەر چۆنیەتیی پێكهێنانی حكومەت و بەڕێوەبردنیەتی و تا ئێستا قسە لەسەر پۆستەكان نەكراوە.

دەربارەی مووچە و ناڕەزایەتی مووچەخۆران و مانگرتنی مامۆستایان و فەرمانبەران وتی: “ناڕازایەتی و ڕێپێوان ڕێگەی پێدراوە، بەڵام کات و هۆکار و ئاراستەكەی جێگەی پرسیارن، ئەوەی مانگرتوان داوای دەکەن حکوومەتی هەرێمی كوردستان و سەرۆكایەتیی هەرێم لەمێژە لەگەڵ بەغدا هەوڵی چارەسەرکردنی دەدەن”.

وتیشی: “ئاستەنگی گەورە بەهۆی حكومەتی عێراقەوەیە، كە كێشەی مووچەی مووچەخۆرانی هەرێمی كوردستانی چارەسەر نەكردووە و خەڵكی كوردستان پێیەوە دەناڵێنن، بۆیە ڕامان وایە دەبێ حكومەتی عێراق بێتە سەر هێڵ و چارەسەری كێشەكان بكات.”