لەسەر دوو شەقامی سنووری ئیدارەی گەرمیان کامێرای خاڵ بۆ خاڵ دادەنرێت، ھاتووچۆی گەرمیانیش دەڵێت: کۆمپانیا ھاتوون شوێنی کامێرەکانیان دیاریکردووە و 18 کامێرا دادەنرێن.
سامان عەلی، وتەبێژی ھاتووچۆی گەرمیان ڕایگەیاندووە، ”لە چەند ڕۆژی ڕابردوودا، تیمێک لە ھاتووچۆی سلێمانی و ئەو کۆمپانیایەی کامێرای خاڵ بۆ خاڵ دادەنێت، ھاتن سەردانی شەقامی کەلار – کفری و ڕێگەی گردەگۆزینەیان کرد بۆ دانانی کامێر”.
وتیشی، “شوێنی دانانی کامێراکان دیاریکراوە، لەسەر ھەر سایدێکی ڕێگەی کەلار – کفری، 9 کامێرا دەدەنرێت، واتە بەھەردوو ئاڕاستەکە 18 کامێرا، یەکەم کامێراش لە کەلارەوە لە پردەکەی شەھید محەمەد تاڵەبانی دادەنرێت”.
ئاماژەی بەوەشکرد، “پێیان باشبووە کامێرا لەسەر ڕێگەی گردەگۆزینەش دابنرێت، لە ترافیک لایتی قەڵای شێروانە دەستپێدەکات بۆ فلکەی گردەگۆزینە، ھەر ئاراستەیەکی شەقامەکە دوو کامێرا دادەنرێت”.
لەبارەی دانانی کامێرا لە رێگەی کەلار بۆ دەربەندیخان سامان عەلی وتی، “ئەو رێگەیە تا ئێستا 96%ی تەواو کراوە، هەرکات بەشێوەی 100% تەواوکرا، کامیرای خاڵ بۆ خاڵ بۆ ئەو ڕێگایەش دادەنرێت”.
