سەندیکای ڕۆژنامەنووسانی کوردستان ڕاگەیەندراوێکی لە بارەی ڕێگرییەکانی پۆلیسی چالاکییە مەدەنییەکان لە ڕۆژنامەنووسانی هەولێر بڵاوکردەوە و ڕایگەیاند، داوا لەرۆژنامەنووسان دەكەین خۆیان لە بەریەككەوتنی نێوان خۆپیشاندەران و هێزە ئەمنییەکان بە دوور بگرن.
ئەنجومەنی سەندیکای ڕۆژنامەنووسانی کوردستان لە ڕاگەیەندراوێکدا دەڵێت: بەهۆی پێشپێگرتنی ژمارەیەك خۆپیشاندەر لەهاتنیان بۆ ناو شاری هەولێر لەبازگەی دێگەڵە گرژی دروست بوو، پۆلیسی چالاكییە مەدەنییەكان گازی فرمێسك رێژی بۆ بڵاوەپێكردنی ئامادەبووان بەكارهێنا.
باسی لەوەشکردووە: دواتر ژمارەیەك لەتیمەكانی میدیا بەهۆی بارودۆخە شڵەژاوەكە رێگریان لێكرا بگەڕێنەوە هەولێر و هەروەها رێكاری تووند لەلایەن دەزگا ئەمنییە پەیوەندیدارەكان لەبەرامبەر ژمارەیەك رۆژنامەنووس گیراوەتەبەر.
دەشڵێت: ئەنجوومەنی سەندیكای رۆژنامەنووسانی كوردستان داوا لە لایەنە پەیوەندیدارەكان دەكات رێز لەكاری رۆژنامەنووسان بگرن، “هاوکات داواش لەرۆژنامەنووسان و تیمەكانی راگەیاندن دەكەین پەیڕەوی رێكارەكانی سەلامەتی پیشەیی بكەن و خۆیان لەمەترسییەكانی ساتی شڵەژان و بەریەككەوتنی نێوان خۆپیشاندەران و پۆلیسی چالاكییە مەدەنییەكان بە دوور بگرن”.
ئەوەشی وتووە: رێگریکردن لە رۆژنامەنووسان بۆ رووماڵکردنی رووداوەکان، دەست بەسەرداگرتنی کەلوپەل و رێگە نەدان بە گەڕانەوەیان بۆ هەولێر، پێشێلکردنی مافی رۆژنامەنووسانەو داوا لە هێزە ئەمنییەکان دەکەین مامەڵەی دروست لەگەڵ رۆژنامەنووسان بکەن.
ئەنجومەکە، داواش لە رۆژنامەنووسان دەکات لەكاتی پێویست و بۆ بەدەنگەوە هاتن پەیوەندی بە لیژنەی داكۆكی لە ئازادی و مافی رۆژنامەنووسان بكەن.
