وەزارەتی دارایی عێراق بڕیارێک لە دژی خانەنشینانی هەرێمی کوردستان دەدات و لە ئەگەری جێبەجێکردنیدا ئەو پارەیەی خانەنشینییەیان لێوەردەگیرێتەوە کە لە بەر لە بڕیارەکەی مانگی ١١ی ٢٠٢٢ی دادگای فیرداڵییەوە بۆیان هەژمارکراوە.
ئەمڕۆ دووشەممە، سۆران عومەر، ئەندامی لیژنەی ئابووری ئەنجومەنی نوێنەران ڕایگەیاند، “مووچەی خانەنشینان لە مانگی دوودا گۆڕانکاری بەسەردا دێت، وەزارەتی دارایی عێراق دەڵێت هاوتاکردنی مووچەی خانەنشینی لەدوای دەرچوونی بڕیاری دادگای فیدراڵیەوە جێبەجێ دەکرێت واتە لە ٢٣/١١/٢٠٢٢ بە دوا”.
ڕوونیشیکردەوە کە “ئەوەی پێشتر هەرێمی کوردستان مووچەکەی هاوتا کردبوو هەڵدەوەشێتەوە و دەیانەوێ پارەکەشیان لێ وەربگرنەوە”.
سۆران عومەر ڕاشیگەیاند، “ئەمە ناحەقیە بەرامبەر بەخانەنشیننان و لەهەوڵداین یاسای خانەنشینی یەکگرتووی عێراق بەسەر هەموو خانەنشیناندا جێبەجێ بکرێت نەک تەنها ئەوانەی لە دوای دەرچوونی بڕیاری دادگای فیدراڵییەوە خانەنشین بوون”.
