پەیمانگای چاکسازی تاوانکاری کوردستان داوا لە سەرۆکی حکومەتی هەرێم دەکات پێشوازی لە مانگرتووەکانی سلێمانی بکات و گوێ لە داواکارییەکانیان بگرێت.
پەیمانگای چاکسازی تاوانکاری کوردستان ڕایگەیاندن، “داوا لە بەڕێز سەرۆکی حکومەت دەکەین کە پێشوازی لەو سیانزە مانگرتووەی پارێزگای سلێمانی بکات وداوەتیان بکات بۆ هەولێری سەربەرز و لەگەڵ کابینەکەی بفەرمووێت لەنزیکەوە گوێ لەداواکارییەکانیان بگرێت”.
لە ڕاگەیەندراوەکەدا هاتووە “داوا لەو هاووڵاتیە مانگرتووانە دەکەین کە بەوپەڕی سینگ فراوانیەوە وەک هاووڵاتیەکی باش ڕۆڵی خۆیان بگێڕن ولەسنووری ڕێز و نیشتیمانپەروەریدا داواکاریەکانیان بە جەنابی سەرۆکی حکومەت بڵێن بۆ ئەوەی حاڵەتی تاوانکاری وگرژی وتێکچوونی ئاشتی کۆمەڵایەتی وئاشتی دەروونی وئاشتی ئابووری ڕوو نەودات وهەرێمەکەمان پارێزراوبێت وسەقامگیری ئاسایشی نەتەوەیی بەرەو تێکچوون نەڕوات پێشێلکارانی یاسا نەتوانن ببنە بەشێک لە ئەجندایەکی نانیشتیمانی، ئەمەش ڕێزگرتنە لەکەس وکاری شەهیدان وئەنفالکراوان وشەهیدانی شاخ وشار وڕاپەڕینەکان”.
ئەم ڕاگەیەندراوەی ڕێکخراوەکە لە کاتێکدایە کە ماوەی دوو هەفتەیە 13 مامۆستا و فەرمانبەر لە سلێمانی مانیانگرتووە سەرەکیترین داواکارییەکانیان بریتییە لە تەوتین و دەستپێکردنەوەی پلەبەرزکردنەوە و خەرجکردنی مووچەکانیان.
