شارەزایەكی كەشناسی هۆشداری زوقم و بەستن و شەختە دەدات و دەڵێت: ئەمشەو پلەی گەرما بۆ 5- تاوەكو 12- نزم دەبێتەوە.
پشتیوان ئیبراهیم، شارەزای كەشناسی بڵاویكردەوە، ئەمشەو پلەکانی گەرما زیاتر نزم دەبنەوە لە تەواوی ناوچەکان بۆ سفر و ژێر سفری سەدی و شەختە و بەستن دروست دەبێت.
ڕاشیگەیاندووە، نزم بوونەوەی پلەکانی گەرما و دروست بوونی زوقم و شەختە بەجۆرێكە لە ناوچە شاخاوییەکان لە ڕۆژدا ( 0 پلە بۆ 10+ پلە ) نزم دەبێتەوە و لە شەودا ( 5- پلە بۆ 12- پلە ) ژێر سفری سەدی نزم دەبێتەوە .
ڕوونیشی كردۆتەوە، لە ناوچە دەشتاییەکان و ناوسەنتەری شارەکان لە ڕۆژدا پلەی گەرما لە ( 10+ پلە بۆ 12+ پلە ) نزم دەبێتەوە و لە شەودا ( 0 پلە بۆ 4- پلە ) ژێر سفری سەدی نزم دەبێتەوە .
ئاماژەی بەوەشكردووە، سبەی دوو شەممە 10/2/2025 ئاسمان خۆر و پەڵە هەور دەبێ.
لە كۆتایی هەفتەی ڕابردووەوە شەپۆلێكی سەرما و باران و بەفر تەواوی ناوچەكانی هەرێمی كوردستانی گرتۆتەوە و لە ئێستاشدا بەهۆی ساماڵی ئاسمان و بوونی ڕەشەبا و بارستە هەوایەكی ساردەوە پلەكانی گەرما بەتەواوی دابەزیون و كەشێكی تەواو زستانە ناوچەكەی گرتۆتەوە و ئەمڕۆش لە بەشێكی شار و شارۆچكەكان بۆ خوێندكاران كرا بە پشوو.
