مەڵبەندی دیراساتی گشتی و ناوەندی کاروباری یاسایی یەکێتیی نیشتمانیی کوردستان، خولێکی تایبەتمەندیان بۆ ئەندامانی پەرلەمانی کوردستان لە فراکسیۆنی سەوز لە ژێرناوی (پەرەپێدانی بنەماکانی کاری پەرلەمانی) کردەوە و تیایدا قوباد تاڵەبانی وتی، “سیاسەتەکانی یەکێتی دەبنە کارنامەی حکومەتی داهاتوو”.
قوباد تاڵەبانی ڕایگەیاند، رۆڵی ئێوەی پەرلەمانتاران لە شەشەمین خولی پەرلەماندا زۆر گرنگ دەبێت، بەتایبەت لە دەرکردنی یاسا و چاودێری کردنەوە، بۆیە دەبێت ڕۆڵتان هەبێت لە دەرکردنی یاسای گرنگ کە بۆ باشترکردنی سیستمەی سیاسی و ژیان و گوزەرانی کۆمەڵانی خەڵکی کوردستان پێویستن. جگە لەوە گرنگە چاودێرێکی وردی سەر حکومەت بن و کار بکەن بۆ دەرکردنی یاساکان.
ئاماژەی بەوەشکرد: ڕۆڵی گرنگی پەرلەمانتارانمان بەتایبەت لەدوای پێکهێنانی لیژنەکانی پەرلەمان دەست پێدەکات. چونکە کارە وردەکە لەناو لیژنەکاندایە و وتیشی، “گرنگە جۆرێک لە هاوسەنگی هەبێت لە کارکردن و یاسادانان و چاودێریدا، کە چۆن چاودێر بین بێ ئەوەی ڕێگر بین؟”.
سەبارەت بە یەک تیمی نێوان پەرلەمانتارانی فراکسیۆنی سەوزیش، قوباد تاڵەبانی وتی: “جگە لەناو خۆتان، گرنگە بۆ لەمەودوا پەیوەندییەکانتان لەگەڵ پەرلەمانتارانی فراکسیۆنی سەوز لە بەغدا زیاتر بێت، چونکە وەک پێویست لە کوردستاندا هێزی پەرلەمانیی خۆمان بەرامبەر بە بەغدا بەکارنەهێناوە”.
لەبارەی پەیوەندی نێوان فراکسیۆنی سەوز و فراکسیۆنەکانی دیکەی پەرلەمانیش، قوباد تاڵەبانی ئەوەی خستەڕوو: فراکسیۆنی سەوز هەمیشە پەیوەندییەکی باشی لەگەڵ فراکسیۆنەکانی ناو پەرلەمان هەبووە و گرنگە ئێوەش بەهەمانشێوە پەیوەندیتان باش بێت و هاوکاریان بن لەو یاسایانەی، کە بۆ بەرژەوەندیی گشتی پێشکەش دەکرێن.
باسی لەوەشکرد، ئەمرۆ یەکێتیی نیشتمانیی کوردستان سیاسەت و ستراتیجێکی روون و دیاری هەیە. وا دەکەین سیاسەتەکانی یەکێتی ببنە بەشێک لە کارنامەی داهاتووی حکومەتی هەرێمی کوردستان.
خولی (پەرەپێدانی بنەماکانی کاری پەرلەمانی) ماوەی چوار ڕۆژ بەردەوام دەبێت و تیادا چەندین بابەتی پەیوەست بە کاری پەرلەمانی بەشێوەیەکی ئەکادیمی دەوترێنەوە.
