هێزە ئەمنییەکانی هەولێر لە دێگەڵە بە بە زەبری هێز و غازی فرمێسكڕێژ کۆتاییان بە خۆپیشاندانی مامۆستایان و فەرمانبەرانی ناڕازی هێنا و خۆپیشاندەران ئامادەکاریی بۆ گەڕانەوە دەکەن و ڕایدەگەیەنن، دەگەڕێنەوە بۆ خێمەی شكۆ و كۆڵنادەین.
نوێنەرانی مامۆستایانی ناڕازی و خۆپیشاندەر دوای ئەوەی بە گازی فرمێسك ڕێژ لە بازگەی دێگەڵە دوورخرانەوە لە كۆنفڕانسێكی ڕۆژنامەوانیدا بەیاننامەیەكیان ئاڕاستەی نێردە دبلۆماسییەكان و نەتەوە یەكگرتووەكان لە هەولێر كرد و ڕایانگەیاند، سەیركەن چۆن پارتی فەرمانڕەوا لە دەنگی مامۆستا و مووچەخۆری مەدەنی دەترسێت و سەیركەن ئەوانەی بانگەشەی درۆی دەوڵەتی كوردی و حوكمی سەرتاسەری و یەكبوونیان لەم هەرێمە دەكرد، چۆن لەڕێگەی هێزی نانیشتمانییەوە ڕووبەڕووی خەڵكی بەهەڵوێست و مووچەخۆرە برسییەكانەوە وەستاونەتەوە.
ڕاشیانگەیاند، بەم ڕێگرییە نادەستووری و نایاساییەوە بۆ پایتەخت سەلماندیان چەندە بەتەنگ تۆخكردنەوەی سنووری دێگەڵەوەن.
ئاماژەیان بەوەشكرد، ئێمە هاتین لە پایتەختەوە بانگەوازی ویژدان ڕاتەكاندن و بەدەمەوەهاتنی گیانی مانگرتووانی هاوڕێ خۆڕاگرەكانمان بدەین.
دەشڵێن: بە سەربەرزی و شكۆوە لەم مەیدانی ڕووبەڕووبوونەوەیە دەگەڕێینەوە و پێش دەستپێكردنی یارییەكە لەو دەسەڵاتە و والییەكەیمان بردەوە، كە ئێمەی بە “میوانی ڕەزا گران دانا” و كۆڵنادەین و لە داهاتوودا بە ئیرادە و وزەی نوێوە ڕووبەڕووی دزی دەبینەوە.
