چ رژێمێكە بەهەموو توانای ستەم بكات، كەچی رێنەدات خەڵكی دەردی خۆیان بەیان بكەن
حزبەكانی موعارەزە لەهەولێرو بادینانیش هەن، لەبری بەیاننامە موزایەدە دەبوو پێشڕەوی خەڵك بكەن
دەسەڵاتدارێتی كوردستان ستەمكارو رەفتار فاشییە، موعارەزەكەشی موعارزی بەش و بەركەوتەی دەسەڵاتە
سەرتیپ جەوهەر
چ حزبێكە 800 هەزار دەنگدەری هەبێت و لەهاوارو ناڵەی مامۆستاو فەرمانبەرانیی هەشبەسەر بترسێت؟ ئەگەر ئەنجامی ئەم هەڵبژاردنە راست بوایە، دەبوو كاربەدەستانی حكومەت بەخۆشحاڵییەوە لەهەولێر پێشوازیی لەخەڵكی ناڕازیی بكەن، چونكە بەنەتیجە ئەمانە دەنگدەری خۆیانن! بەڵام بەدڵنیاییەوە ئەو ئەنجامە راست نییە، بۆیە دەسەڵاتداران ئەو ترسەیان هەیە.
لەكوێی دونیابووە رژێمێك بەهەرچی توانای هەیە ستەم لەخەڵك و موچەخۆرانی بكات، كەچی رێنەدات دوو مامۆستاو دوو فەرمانبەری بێنەسەر جادەو دەردی دڵی خۆیان بۆ دونیا بەیان بكەن؟! باشە نەدەبوو لەبری رێگریكردن و لێدان و ئەشكەنجەدانی خۆپێشاندەران، بەرپرسانی حكومەت لەدەروازەی ئەنجومەنی وەزیران پێشوازی لەخۆپێشاندەران بكردایەو گوێیان لەخەم و گرفتەكانیان بگرتایە؟
هەمیشە ستەمكاران ئەزمونی یەكتردووبارە دەكەنەوە، نە دەبینن و نە گوێ دەگرن، لەنازو نیعمەتی خۆیانەوە دەڕواننە ژیانی خەڵك. دەربارو دەوروبەریان چاو و گوێیان دەگرن، بۆیە كاتێك دەبینن خەڵك ناڕازییە بڕوا ناكەن، رێگەی خراپ دەگرنەبەر بۆ چارەسەركردن، ئەوەی جێی سەرنجە، كۆتایی هەموو ستەمكاران لەیەكتر دەچێت.
ئەوانەی لەسلێمانیەوە هاتوون دەستیان خۆش بێت، بەڵام دەبێ ئەوە لەبیر نەكەین كە حزبەكانی موعارەزە لەهەولێرو بادینانیش هەن. لەدوێنێوە باتی دەركرنی بەیاننامەی فرمێسك ئامێز، دەبوو لانیكەم ئەندامەكانی پەرلەمانیانیان كە شەرعیەتی دەنگدەرانیان هەیە، بەپێش پێشڕەوی خەڵكیان كردباو ناڕەزایەتی خۆیان خەڵكی كوردستانیان بگەیاندبا ئەو دەسەڵاتدارێتیە.
خەڵكی كوردستان داماو و بێچارەو بێدەرەتانن، دەسەڵاتدارێتیەكەی ستەمكارو رەفتار فاشییە، موعارەزەكەشی موعارەزی بەش و بەركەوتەی دەسەڵاتە. بەرپرسانی رژێمی حوكمڕان، كوردستانیان كردووە بەپاوانی خۆیان و كەسوكاریان، موعارەزەش لاوازەو ئەجێندای گۆڕینی ژیانی وەك پێویست نییە، بەشێكیان تەنها دەنگەدەنگی سۆشیال میدیاو سەر تەلفزیۆنەكانە، لەوەخراپتر، بەشێكیان تەنها لەچاوەڕانی بەركەوتەی چەوری حوكمڕانییە هەشیانە قەت ناچێتە دەسەڵات، بەڵام بەئەندامەكانی لەپەرلەمان باشترین پرۆژەی سەرمایەگوزارین بۆی، بۆیە ئەوانەی ئەمڕۆ خۆپێشاندانیان كردووە، نوێنەرایەتی هیچ حزب و لایەنێك ناكەن، نوێنەرایەتی ئێشوئازاری خەڵك دەكەن بگرە بەشێك لەحزب و لایەنە موعارەزەكان دەیانەوێ سواری ئەو شەپۆلی ناڕەزایەتیە ببن و لەو رێگەیەوە موزایەدە بەسەر خەڵكەوە بكەن.
لەكوردستان موعارەزەو دەسەڵات بوونەتە بارێكی گران بەسەر ژیانی خەڵك و ئایندەی ئەم قەوارەیە. دەسەڵاتدارەكەی بەهۆی لاوازی موعارەزەوە غرورێكی زۆری گرتووەو بەهەرچی توانای هەیە ستەم لەخەڵك دەكات، لەودیو دیوارە بەرزەكانیانەوەن و نەدەبینن و نەدەبیستن! مخابن موعارەزەكەیشی (زۆربەیان) جگە لەوەی بەشێكن لەئەجێندای ئیقلیمیی، هاوكات بوونەتە بەشێك لەو مەنزمە فاسیدەی حوكمڕانیی. لەبری موعارەزەبوونی راستەقینەو بوونە بەدیلی حوكمڕانیی، بوونەتە ئەداتێك بۆ دامركاندنەوەی توڕەیی خەڵك و لەهەڵبژاردنەكان خەڵك بەناچاریی دەنگیان پێدەدات و ئەوانیش دەنگەكانیان بۆ پۆست و ئیمتیاز هەرزانفرۆش دەكەن. بۆیە هەر وەكخۆیان دەمێننەوەو دەقیان بەنازناوی موعارەزەبوونەوە گرتووە.
زۆربەیان موعارەزە نین تا گۆڕانكاریی بكەن، بەڵكو موعارەزەن تا بەشداریی لەحكومەت بكەن و وەك پارتی و یەكێتیی بەركەوتەیان هەبێت لەنازو نیعمەتیی ئەم حكومڕانیە فاسیدە؟! لەو نێوانەشدا خەڵكی هەشبەسەرو ماڵوێران، ستەملێكراو (لەچاوەڕوانی گۆدۆ)ن تا دەركەوێت و رزگاریان بكات، كەچی گۆدۆ دێت و لەبری رزگاركردنیان دەبێتە ستەمكارێكی گەورە وەكچۆن لەرۆمانی (باخچەی ئاژەڵان)ی جۆرج ئۆرێل دەبینین بەرازەكە كە (ناپلیۆن) ناوە سەركردایەتی شۆرش دەكات لەپەنای دروشمی بریقەدارو خەونی گەورە بۆ خەڵكەكەی دروستدەكات، دواتر هەڵدەگەڕێتەوەو دەكەوێتە گیانی خەڵكەكەی و دەبێتە ستەمكارێكی گەورە.
