ئەندامێکی پەرلەمانی عێڕاق داواکانی مانگرتووان بە ڕەوا دەبینێت و دەڵێت”مانگرتووان بۆ چارەسەری گرفتی مووچە ژیانیان خستۆتە مەترسییەوە”.
کاروان یاروەیس، ئەندامی پەرلەمانی عێڕاق لە فراکسیۆنی یەکێتی لە دیمانەیەکیدا بۆ ڕۆژنامەی (القدس العربی)، ڕایگەیاند، بۆ چارەسەری گرفتی مووچە و دەرهێنانی لە ململانیکانی هەرولیر و بەغدا و تەوتینی مووچەکانیان، ژمارەیەک مامۆستا و فەرمانبەر لە سنووری سلێمانی و لەبەردەم بارەگای نەتەوەیەکگرتووەکان خێمەیان هەڵداوە و ماوەی 12 ڕۆژ زیاترە مانیان لە خواردن گرتووە، ئەمەش وایکردووە دۆخی تەندروستی بەشێکیان بەتەواوەتی تیکچووە و بەشێکی تریشیان بەرەو خراپتر دەڕوات.
ئاماژەی بەوەشداوە، مامۆستایان و فەرمانبەرانی مانگرتوو لە خواردن دەیانەوێت مووچەکانیان تەوتین بکرێت و چارەسەری ڕیشەیی بۆ ئەو کێشە دووبارەبووانە بدۆزنەوە کە بەردەوام ڕووبەڕووی مووچەخۆران دەبنەوە و گرفتی گەورەی داراییان بۆ دروستدەکات.
ڕوونیشیکردەوە، مامۆستایان و فەرمانبەرانی سلێمانی، بەچەندین ڕێگەی مەدەنی چەند ساڵێکە داوا دەکەن بۆ دۆزینەوەی چارەسەری ڕیشەیی بۆ کێشەی دواکەوتنی خەرجکردنی مووچە و تەوتین، ئەمە جگە لە داواکارییە بەردەوامەکانیان بۆ کردنەوەی پلەبەرزکردنەوە.
کاروان یاروەیس داوای لە پەرلەمانی عێراق و حکومەتی فیدراڵی لە بەغدا کرد بە زووترین کات لیژنەیەک بنێرن بۆ گوێگرتن لە داواکارییەکانی مامۆستایان و فەرمانبەران بۆ ئەوەی بارودۆخی تەندروستییان زیاتر تێک نەچێت و کێشەی مووچەی فەرمانبەرانی هەرێمی کوردستان چارەسەر بکرێت.
